OSHAKATIS – ǀHaob ain ge 901 studentna Universitaits Namibiab dis (Unam) di ǀawas ǀkharigu di kampesde xu ǂoa ge wekheb di Wunstaxtsēs ai ǁkhāǁkhāǂuisens ǂan!gâde gere !khō!oa. 

ǁNāpab Unams di !nakaǂnôa kanseliri, Professor Kenneth Matengu gere ǀgonǀgon!gao, nē ǂnûiǂgās ūhâ !ereamxasiba, Namibiab ǀhûhâsi tsî sâuǁkhāsib !hū!nāsise ai!gûs !nâ !â tsî huikhâi!nâs ǂnamipe. 

Nē ǁaxasib tawab gere gowaǀîsa mā soab aib ge Matenguba ge mî, nē ǁkhāǁkhāǂuisen hâ khoen, Namibiab ǀhûhâsi tsî sâuǁkhāsib omkhâis !nâs, Unamsa a !â !khais di ǁgauǁgaus ase īsa. 

“Nētsēs ge Universitaits Namibiab disa ǁnā !ereamxasib di dīǀoaǀoas ase 901 ǁkhāǁkhāǂuisen hâ khoena !kharaga sîsen!khaigu hîa !hū!nāsise tsî hoa !hūbaisise hâgu !aroma ra ǂan!gâ tsî sîǂui. 

Nēn ge sida Unams di !khamǂui-aon ǀgâsib din, ǂhanu-aisib ǂgaoǀkhāsa !harodi ǁga nî ǁgariǂuihes tsî !goaxa ǁaeb mûǂuigu di īǁkhāsigu aimâba-aona,” tib ge ge mî. 

Nē !gôab ge ǂoa ge kurib di 864 !gôab tawa 4%gu di ǀarosensa ra ǁgau tsî !kharaga !harigu, ǂgaiǀons ai engineering-i, ǀae!khō-aosis, ǁgau!nâs, ǂhanuǂans tsî ǂgaeǂguis !nâ mâs tsîna !khōǂgā hâ. 

Matengub gere mîsa !oas ge Fakultaits ǁGau!nâs tsî Khoesiǂans disa 59%gu ǁkhāǁkhāǂuisenaon disa ūhâ, ǀgamǁîse Fakultaits !Hū-omkhâis, Engineering-i tsî Kuruǂans dis xa 22%gu ǀkha saohe hâse, tsîs Fakultaits ǂUrusib ǂAndi tsî ǀGoaǀae!khōs Soǀôan dis xa 18%gu ǀkha saohe hâse. 

Matengub ge mîsa !oa i ge nē !gôaba xu 65%ga a tarekhoe tsî 35%ga a aoresib di. 

Nēpa a !khōǂgāsan ge hû !auga!hūgu studentn hîa Mozambiguegi, Zambiab tsî Zimbabweb hâga xu hân tsî !nonan hîa kaise ǂkhawusa tsî khaohâ kaihe ge hâ i ǀhûhâsiga xu hâna a !khōǂgāsa. 

Mâǂoa gere nēpas ge 13 studentn hîa ǂguro !nās ase ge ǀasase a ǂgâxa-ūhe !nona kurigu di xrati, Forestry and Rangeland Management di a ǂansab !nâ ge ǁkhāǁkhāǂuisenna. 

Hāǀaro rases ge Jose Eduardo dos Santos Kampesa 105 engineerna ge ǁkhāǁkhāǂui. ǀNai sîsengu !nâ ǂguro xratga dītoa tsî ai!â ra ǁkhāǁkhāǂuisen khoen xan ge 21 Diplomaga ǀAe!khōsis ǂAns !nâ ge !khō!oa tsî 17 Master’s xratga !kharaga !âgu !nâ. 

Matengub ǀams ai ge mîs ge, Unams nî ai!gûsa, ǁkhāǁkhāǂuisentoa ran nî ǂhâbasa ǂans, ǁkhāsigu tsî ū!oahesa ǂūsi tanisendi ǀkha !auga ûib !nâ ǂoasa. 

– Nampa