TSOAXUBAMS – !Nakaǂnôa ministers, kai!ā tsî !garo!ā omkhâis dis, Eveline !Nawases-Taeyeles ge ra mî, !khāǂoa ra mâsib, marin ra ǁgauo!nâse tsî ǂhâbasa tama ǀgaugu !nâ sîsenūhes tsî ǂgiǂgosisets a tarisa aimâis tsîn ge ǂgaoǀkhāsa !gao!gao !oabade !hūb a ǂhabase māsa ra !hâumâi. Nē mâsib ge, ministers ra mîsa !oa Namibiaǁîna ǂhâbasa !oabade ra ǀhana. 

“ǀKharisi tsî !ā!nāsi ǂgaeǂguidi ge ǁnā !khaib hîa aitsama !khū!khūsens tsî ǀgorasa !oabade mās !nâ dīs, hoana koma ǁnān hîa ge khaohâ kaisa ina sîsenmās di ǀons !naka ra dīse,” tis ge ministersa ge mî. ǂOa ge wekheb Wunstaxtsēs ais ge Tsoaxubams !nâ !Ā!nāsi ǂGaeguidi Namibiab di di (Alan) ǀhaosa ǂhanusise gere ǁkhowa-am soab ais ge ministersa nēna gere mî. 

Nē ǀhaos tawa ge ǂgaeǀhao hâ in ge !ā!nāsi ǀawemā-aon, !ā!nāsi !ā!khōmâi-aon tsî Dana Sîsenǂui ra Maisan Namibiab a ǂhabase hân tsî Afrikab ǂgaeǂgui-aon tsîna, mâtin ǁîn !ā!nāsi ǂgaeǂguide ra dīs ǀgoweǀnōdi ǀkha. 

Nē ǀhaos di ǂgaiǂams ge ‘ǂGaoǀkhāsa ǂGaeǂguisa ǂGaoǀkhāsa !Oabade Mās !nâ-ū’, ti hâ. !Nakaǂnôa ministers gere mîsa !oab ge ǂgaeǂgui ra ǂhanuba ǂâiǂhansens ǀkha ǂnôa, !nāsa ǀkharisi tsî !ā!nāsi ǂgaeǂguidi ǁama!khunis ǀkha hâ ǀhôakao!naris, ǂhanu tamase ra dīhe sîsengu tsî ǂnûiǂuisa marina !aromadi ai sîsenū tama is tsîn ǂnamipe. 

ǁÎs ge mîs ge, nē xūn ǀnî ǁaega sîsengu soadi !nâ ra !khaeǂgāhe khoen sîsenga dī ǁoas xa ra !aromahe, xawe !nāsa ǁaega ǁkhāti ǂhanu tamase ra ǂgiǂgosise dīhe ǀawemādi xa ra !aromahesa. 

Ministers noxopa ge mîs ge, aiǁgausen marin hîa sentrale ǂhanub xa ǂhâbasa omkhâisens projekdi !aroma ra māhena, !naris tsî !nariǂoas ǀkha ra !gûǁare xūna mātares !aroma ra sîsenūhe !khaisa. !Nawases-Taeyeles ai!â ge mîs ge, Namibiaǁîn ǁkhāsib !auga hâ !oabade ǂgan tama hâsa. 

“ǁÎn hoara ra ôas ge ǀgora-e ūhâ tama tsî mâ ǀguiǀguibe !hûǁî-i hoa-i nî ǂhanu-aise hō !oabadi ǀguide ra ǂhâba. ǁÎn ge ǂâuǀoa hâ ǁgau!nâsa ôasana ra ǂhâbaba, khomais tsî xoa ǁkhās ǀguis ose, xawe ǁkhāsigu hîa sîsen!khaigu ai ra ǂgaoǀkhāhega ǁîna hōbasa. 

ǁÎn ge ǁawosa sîsenga ra ǂhâba in !gâi ûiga ūhâ ǁkhā, !gōsase omna ǁamabasen tsî !ā!nāsi ǂgaeǂguidi ra mā !oabade mātare ǁkhā tsî !hūb sâuǁkhāsib ǀomkhâis !nâ huisa,” tis ge gere ǂgan. 

Suid Afrikab !Ā!nāsi ǂGaeǂguis ǀHûs (Salga) di presidenti, Bheke Charles Stofileb ge ge mî “ǂGaeguis ra ǂkhawusa on ge ǁanǂgāsabena !gomma ra tsâ. 

Xawes ga ǂgaeǂguisa ǂgaoǀkhāsa ǀgaub ai nî dīhes ka, on ge ǁanǂgāsabena ra ǀomkhâi tsîs ge khoesis âna ra oahā,” tib ge ge mî.