ONGWEDIVAS – ǁŌǂoa ra khoen sorode ǂhuwis di ǂâiǀgaub ge harase Namibiab !nâ ǁgamǁaredi !âse go hā, ǁnāpan ra gagasi ǂgaeǂgui-aon, !hao!nāsi ǂgaeǂgui-aon, ǁkhō!oabamā-aon tsî ǁanǂgāsaben tsîna nē ǁhōb, ǂhuwi tamas ka io ǂhuwi tamas is ǂnamipe !kharaga tsâsiga ra ǀgoraguse. ǀNîn ra khom, ǂhuwis nē da ûi!nâ hâ ǁaeb !aroma supu tsî marisi aib a sī!nâhe ǁkhā ǀgauga !khōǂgā hâ !khaisa, nau ǀkhāb ain nauna ra tsâ nē ǀgaub !hao!nāsi ǁnaetigu !oagu ra sîsen tsî ǁnās xōǀkhā gagasi ǁgau!nâdi tsî ǁōǂoa hâ khoe-i di khoesiba ra ǁau!gôa !khaisa.

ǁGamǂaredi ge aoǁguib hîa ǀhûhâsiga ra ǂgaoǂgao!nâb, ǁkhō!oabadi ǂharo ra ǂganǀgaugu tsî ǁkhō!hanagu !aruǀî soana ūhâ tamas is xa ra aimâbahese, !gōsase kai!ādi !nâ. Nausab nē aoǁguiba ǀnî ǁanǂgāsaben, !kharaga gagasi ǂgaeǂgui-aon tsî !hao!nāsi ǂgaegui-aon xa ǀgaisase ge ǂharahe, mîn rasa !oab gui ǀgaub ǀguiba a ū!oasa, tsî ǁnāb ge sorode nî ǁkhōse is diba. ”Sorode ǂhuwis ge sida ǂgomǀgaugu !oagu ū!oasa tama hâ. ǂÂu hâ ǁkhōsoadi ge noxopa hâ tsîn ge ǀaokhoena ǀgui ǀhowa-ās ās !nâ a ǁkhōhe ǁkhā,” tib ge Evangelise Lutherse Babtist Kherkheb Namibiab dib, pastor Laban Mwashekeleba ge mî. ǁÎb gere dîsens ge, tare-i !aromas khoe-i sorosa ­ǁōb khao!gâ nî ǂhuwihesea ǁî-i ǁōb khao!gâs tsîna !gôasiba mā-i tama i tsî.

Ongandjera !Hoa!nāsi ǂGaeǂuis di aiǂnû-aob, Shiimi Nangulab ge ge mî,  sorode nî ǂhuwise is, !hao!nāsise ǁ­în ǁnaetigu ti ǀgui tama hâ, khoen ǁra ǁ­în ǀnamsaben di sorode ǁōb khao!gâs tsîna mû ǂgao, nē mâsiba ū1oas !aroma amaga. Ai!âb ge mîs ge, tsēkorobe ra ǀasa xūna ǂgâxa-ū tsî ǂgaoǀkhā ǁae!gâ da ûihâ xui-aos ge sorode ǂhueis tsîna !goaxa ­ǁaeb !nâ ǁanǂgāsaben !gôagu ra ǀarosen khami a ū!oahe ǁkhā.