• September 22nd, 2018
Login / Register

Likolo lielezwa kumbweshafaza linepo


Matheus Hamutenya Karasburg Kutepelela mwakamaiso yalikolo kuzwelela kubabahulu balikolo kiyazeñwi zetisa kuli mayemo atuto anyazahale mwanaha Namibia. Ao neli maikuto amubakweli kulikwambuyu watuto, lipapali ni sizo, Anna Nghipondoka, yanaize likolo zeñata haliezi hande kakuli babafilwe kulizamaisa habana lyano mwakamaiso yasikolo. Naize kusina kamaiso sakata fasikolo kuzwelela kuyomuhulu wasikolo kutisa kusiyala. Nghipondoka nabulela kanako yamukopano nibabahulu balikolo kwa Karasburg Labubeli, mi naize kutokwa pono kuzwelela kubabañwi babahulu balikolo kuyambukela maticele nibana basiko. “Luswanezi kuba nimaikuto amande mwakutonela bukamuso. Kiyomuhulu feela wasikolo yana niciseho yata kona kueza hande nilisebeliso zenyinyani,” nabulezi. Naize likolo zeñwi haliezi hande kakuli babahulu balikolo basebeleza milelo yabona kwamukunda, basabuzi maticele, kacwalo maticele babañwi habasusuezwi kubeleka hande, naekeleze kuli babahulu balikolo zeñwi habaipulelisi nimaticele babona. Yoneli muzamaisi watuto nahatelezi kuli kamaiso sakata kiyabutokwa kuli likolo lieze hande, kacwalo nakupile babahulu balikolo kuli bacimbule mwakuzamaisa likolo. “Babahulu balikolo baswanezi kulela hamoho nibazamaisi, nimaticele, mubulele kwamaticele bamina, muikabele musebezi, mi mutise maikuto abuikalabelo, taba ye haiezahali, maticele ba, habana sepo mi baikutwa butoto nikulateha.” Naize maticele babañwi habaezi misebezi yabona, kakuli nako kaufela babata kukashiwa, ili taba yanaize iswanezi kufeliswa. “Haiba uticele yana niciseho hautokwi mutu yomuñwi kuli akuyemelele mwamulaho nikukukasha kuli ueze musebezi wahao, musebezi olifelwa kuli ueze.” Nakupile maticele kusebeza katata mwakutisa linepo zende, naize linako zeñwi maticele habatabeli kuselibelisa lisebeliso zabona kuli babe niciseho sakata, naize kalinako zeñata bapalelwa kuleka lisebeliso zekona kubatusa mwakueza lipatisiso. “Mubata kufiwa lika kaufela, nibaiha mwakuzwelapili kwamina beñi, mubata muuso kuli umifepe, mukashwela mwabunjebwe,” nabulezi. Naelelize likolo kuli lifumane litatululo kwamatata kakusebeza hamoho isi kabuñwi.
2018-04-09 10:23:09 5 months ago
Share on social media

Be the first to post a comment...