Auleria Wakudumo
Omunadolongo koshitaasi shopolifi shaGibeon okwa ponokela nokumonifa oshiponga ovanadolongo vavali vomonduda yavo, ovapolifi nokukokota omupangi.
Omupopiliko wopolifi Deputy Commissioner Kauna Shikwambi okwa holola kutya oshiningwanima eshi osha ningwa Etitano lwopo 22h35 moshitaasi shopolifi shaGibeon.
Otaku hokololwa omunadolongo a ponokela nokudenga tete vakwao vavali ovo fiyo e va monifa oshiponga.
“Opolifi oya hanga nale ovanadolongo ava va dengwa ve li mekungu lohonde naashi va patulula omuvelo wodolongo, okwe va ponokela,” Shikwambi ta ti.
Shikwambi okwa ti opolifi oya pondola oku mu tula moiketanga.
Ovanadolongo aveshe vatatu, mwa kwatelwa nakudenga vakwao ova twalwa kokapangelo kashona va ka mone epango lopaunamiti.
Natango, vati omufekelwa okwa twikila ndele ta kokota omupangi poshikesho.
Omufekelwa okwa tuminwa koshipangelo shepangelo shakula koMariental oko e li ta mono epango la wedwa po.
Oshiningwanima shikwao, omulumenhu womukulunhu okwa twa ovanhu vatatu nombele yeemboloto.
Oshiningwanbima eshi osha ningilwa kofalama hai ifanwa Anis Khobeb momudingonoko waGibeon Etitano lwopo 17h00.
Otaku hokololwa oonakutuwa nombele va mona oshiponga neenghono notava mono epango lopaunamiti moshipangelo shepangelo shaMariental.