Sawi Hausiku 

Rundu- Alois Hashipara primary school zomoKavango zoupumezuva kavagwene yiruganeso yomosikunino nombuto ntani nonkaku dokuzisa kosure yina kara nomulyo gokusika ko N$60 000 kayitundire ko NWR Namibia Wildlife Resorts moutano. 

Apa nye kahuyungire pegawo uhwi ou wosikunino ntani nonkaku, NWR muhuyungilipo gwawo Nelson Ahipala katente asi egano lyangesi kuna kara situmbukira sokampani momalikwawo gazo gokugavako konkarapamwe omu vatokora asi yimaliwa nayinye eyi vagwene kutunda melikwamo lyokuduka gatulisirepo NWR vahepa kuyigava konosure domoNamibia. 

‘’ Uhwi ou kuna kara asi nkenye munona gosure tagwana nonkaku dosure. 

Sikunino sosure, noyiruganeso yomosikunino, ntani mbuto kuna hara nye vadiviseko vantu ou asi mulyo unene kukara noudivi yipo sure zina kara zina kara nonondja dazene.’’ 

Yimo ana kutanta. Ashipala katente asi mulyo unene kupa vanona eyi vana pumbwa yipo valivatereseko kerongo lyawo. 

‘’ Sokuhulilira kapi hena tuna hara kumona munona ana kara noudigu mokugazara asi kupi nakagwana nondja dendi dokukwamako. Kuna kara yokukoresa komutjima unene nye nsene kapi vana kara nononkaku dokudwara kosure. 

Ose kuna kuyimona asi uhwi wangesi naureta marunduruko meparu lyawo.’’ 

Yimo ana kutanta. NWR kavageve nonkango dawo dorupandu kwaTELECOM Namibia nanavenye valihamesereremo moamarumbasano gokuduka kwayi varugene dogoro egano lyangesi liyasike mosirugana. 

‘’Eruganeno kumwe ntani elituromo kwakere sininke somulyo unene omu twayasikisamo sitambo soprojeka ezi. 

Ose kuna kara asi mvhura ozo twahepa kudingura nonsure dononzi, mokutara asi kwato munona ogu navasigako merongo ntani meparu lyendi pauntu wendi,’’ yimo ana kugwedako ngoso Ashipala. 

Mukurona sure Asteria Shindimba kapandwire NWR kouhwi ntani vahepa kuvapandura komeho oko nokuvapura asi vayadikepo nonkondja rongero morwa vanona ngesi kuna kuvarongera mononkondwa doyipereki tupu vadika vene. -Nampa