Limba Mupetami

Kavetja Ngaizuvare

ǀAeǁgams di ǂnaumaiǁanǁguigu, !anu āǁgam-i tsî ǂûna hōbasens a !gomsi soab !nâs ge Blē-omdi ǀHûsa ǁîs ǀkhāba xu ra ôa-am ǁanǂgāsabena huisa in ǂhunuma !hanade ǂgā. Nē ǀhûs ge aitsama mâbasen hâ Duitse ǂNûiǂgās xa World Future Councils !nâ-ū marisise ra ǂkhâ!nâhe. 

Nē ǀhûs ǁaxasin ge Katutura Youth Enterprise Centres hîa Wanahedas !nâ ǁgoes tawa ra !gûǁnâ. 

Senters tawan ge ǁhao ra ǁanǂgāsabena supu ǀgauga ra ǁkhāǁkhāhe, koln, spinasi-i, ǀarin tsî koriander-e mâti supu ǀgaugu ai !hana tsî !hanaba !ûi!gâ tsî ǀomkhâi kais tsîna. 

ǁKhātin ge nēpa ǂûsâi!nâ!nā-oms  tsîna ūhâ, ǁnāpan ra ǂûna sâi tsî ǂû!āguse. 

Projeks di ǂâibasens ge, ǁhao-aona mâtin ǀnai a sîsenūsa ǁgam-e !hanaǂgās !aroma a sîsenū ǁkhā !khaisa, aiǁgause !hanaǂûnats go ǁā-ū ǁgam-i tamas ka i o ǁāsenǁgam-e. 

Nē ǀnai sîsenūsa ǁgam-i ge ǀaruba ūhâ ās !nâ ra ǁhōǂgāhe, ǁnāpa-i aitsama ra !anuse, tsî-i ǁgam-i nē-e !hanab !aroma a sîsenūhe ǁkhāse. 

Nē !hanaǂûn ge aitsama ǂûs !aroma ǁgâudi !nâ sîsenūhe ǁkhā tamas ka i o ǁamaxūhe ǁkhās tsîna ī hōǂgās !aroma. 

Blē-omdi ǀHûs di direkters Ina Wilkies ge ge mî, nē proxrammi ǀgam tsēra ǁkhāǁkhākhâisa ǀasase ra ǁani khoen hoan !aroma !khōǂgā hâsa.

 ǂGuro tsēs ǁkhāǁkhākhâis dis ain ge !kharaga !hū!nôan, soresa xu hâ !nâb tsî ǁgam-e !khōdanas xa ra ǁkhāǁkhāhe. 

ǀGamǁî tsēs ain ge !hanaba ǁgâudi tawa ra aiǂhomi.

 ǁKhāǁkhākhâis ǀams ain ge ǀarub, !khomn, ǂûn tsî !nari-ūs maridi tsîna ra māhe. 

ǁNā khoen hîa ǁîn !hanaga ra mû!gâ tsî ǀomkhâisa ǁgaun ǀguin ge ai!â hâ ǁkhāǁkhākhâide ra !khō!oa. Nēsis kōse di ge 200 !hanade ǀAeǁgams di ǂnaumaiǁanǁguigu !nâ a ǂnuwisa. 

Nē ǂguro !haros khao!gân ge !gâi!gâxa ǁ-hao-aona ǀō-aisa ǁkhāǁkhākhâidi !nâ ra !kharu, ǂgaiǀons ai haina mûǂams, ǁgamabena !khōdanasa ǀgaub !nâ ūǀgaras tsî ǀomkhâis !hanagu disa khoraǂuis tsîna. 

“Star Clubs” ǁgan ge ǀguixa tsî !gari sîsenaona ra !kharu tsî !kharaga khoen ǀkha !khōǁôagu hâse ra ai!gû, aitsama mâbasens mûǂuiba ra saose. 

Auguste Kankonos, -ǁîs tsîn a nē ǁ-hao-aon di ǀgui tsî Goreangab ǁanǁguib !nâ ǁanhâs ge gere mî, nē ǁkhāǁkhākhâidi ge ǁîsa kaise a huisa, ǀgaisases nēsi mâ tsî ǁanǂgāsaben hîa !gâi!gâibasensa ūhâna nē ǁkhāǁkhākhâide ra māse.