Omupresidente Nangolo Mbumba okwa ti epangelo ota li twikile okutunga eepate doshinanena molwashi eepate oda fimana meyambulepo leliko loshilongo.
Edi Mbumba okwe di popya mEtivali pefimbo kwa li ta patulula pambelewa opate mondjila yaGobabis-Aminuis moshitukulwa shaMaheke.
“Ngeenge ponhele yonhumba pa enda opate iwa otashi pitike i longifwe kovanangeshefa okutwala oilandifomwa keenhele da yooloka,” ta ti.
Opota ei oya tungwa ya kwatafana fiyo okoshitukulwa shaHardap.
Ovaleli vopapolitika veendodo da yooloka mwa kwatelwa ovaleli vopamufyuululwakalo okwa li va holoka kepatululo pambelewa lopate.
Mbumba okwa yelifa ta ti epangelo ota li twikile okuyandjaneka omayakulo koshiwana noshoyo okukandula po omashongo aa taalelwa koshiwana.
Okwa yelifa ta ti opate ei otai ka longifwa kovapashioni tava di kondje yoshilongo okukala tava talele po oshitukulwa shaMahake.
“Eepate diwa ota di nane ovapashioni, naashi otashi eta ovapashioni opo va etele oshiwana oyuuyemo,” ta ti.
Okwa weda po ta ti opate yoshinanena otai yambula po natango oshikondo shounamapya molwashi otai ka longifwa koyeendifo okutwala oilongifo keefaalama ile okuumbata oimuna oku ya keenhele da yooloka. Mbumba okwa kumaida Ovaanamibia opo va longele kumwe okutunga oshilongo nokuyandjaneka omayakulo koshiwana.
Efiku tuu olo, Omupresidente natango okwa patulula ombelewa onhele yoMuseum oyo tai ka tuvikilwa oinima i kulu yeenghulunghedi.
Onhele ei otai ka longifwa koshiwana noshoyo kovapashioni tava ka dja kondje yoshilongo.