KATIMA MULILO – Yene ili membala wandu ya milao kuyemela kopano ya DTA niyana fumanwi mulatu wakubata kukeyula sikiliti sa Caprivi kwanaha Namibia, Geoffrey Mwilima, natimezi viki yefelile mwasipatela mwa Windoko, kasamulo anako yebato likana kweli amano lukululwa mwatolongo.

Mwilima yanana ni lilimo zemashumi asupile, yana kile aina mwasitokisi lilimo zeñata hala taba yabukwenuheli bwakubata kukeyula sikiliti sa Caprivi kwanaha Namibia, nalukuluzwi mwakweli ya Ñulule amano ina mwatolongo lilimo zefitelela licika ni licika zana tomezwi. 

Amano lukululwa, Mwilima nakile ‘amuhelwa katabo kibalubasi lwahae, mizwale ni balikani mwa sikiliti sa Zambezi.

Kono nakile aiswa kwa Windoko kweli ye kwalikalafo. Limembala za lubasi libulela kuli nakula lipiyo mi nalobalizwe nako yatimela. 

Liñusa la lifu la hae haliyo fita kwa munzi kwana pepezwi kwa Kanono nekubile ni kukuza. Induna wa Kanono Bothman Sikute, ili malumahe Mwilima, napakile abulela kuli lifu la hae
kilisuba leli tuna kwa lubasi ni sikiliti sa Zambezi kabupala.

“Neli muuna ya ikokobeza, wapilu yende. Natisa batu hamoho. Nana ni likute mi hañata nalu elezanga kuli luswalisane.” 

Sikute nakile ahupula kuli kanako yalukuluha mwatolongo mwa kweli ya Ñulule ñohola, Mwilima nakile ashaela kutisano ya lipilu.

“Nalubulelezi kuli lulibale zene ezahezi kwamulaho mi luzwele pata hamoho. Nekuna ni likakalezo zeñata hala yana mubetekile nisene sitisize kuli atamiwe, kono nalu elelize kuli lutuhele kuambola zeo nikuli luswalisane,” abulezi. 

Sikute naize kufofala kwa makete ahae neku kalile hane asali mwatolongo.

“Lipiyo zahae nelisa beleki hande. Kakuba lubasi lulumela kuli makete ahae natotobezi bakeñisa mayemo maswe ane atalimana ni ona mwatolongo. Kweli ye nakutisizwe kwa Windoko kwa likalafo, kona kwana inzi kufitela lifu la hae,” nabulezi. 

Hana alabela kwa lifu la hae muetapili wakopano ya Popular Democratic Movement, McHenry Venaani nanyazize mubuso, naize babeleki bamubuso nebasa telezi kwalikelezo hala makete a Mwilima.

“Kalilimo zeñata, neninze nifa mamela kwa mubuso, kuñolela mueteleli wanaha mañolo, muzamaisi watolongo, nikwa likolo la litolongo ni mabasi, kukupa kuli Geoffrey Mwilima alukululwe bakeñisa makete ahae,” nekubulezi Venaani.  

Naize nalukuluzwi kakulyeha.

“Nebamulukuluzi kasamulaho akulemuha kuli nasali fakaufi nikushwa. Kufitile feela kweli amano lukulwa, kikale ashwa. Kona zene ni eleza. Bupaki bwa ni lukulula hala zene ni bulela,”
nabulezi.

Kanako yene ali membala wandu ya milao, Mwilima ubihiwa kuli neli muuna walipolitiki yana kutekeha. 

Venaani umupaka kuli nana ni zibo mi neli membala wandu ya milao yomutuna. 

“Neli muuna yana bata kutisano ya lipilu,” nekubulezi Venaani. Naize nihaike nebakile bashelana hala maikuto akukeyula sikiliti, naize neba utwana.

“Neni kile namupotela mwatolongo kufitelela hasupile. Nakile ani lizeza hanali mwatolongo kufitelela hamashumi amane. Kuna naswana inge ndate, mulikani ni muzwale, ni lila lifu la hae kapilu ye butuku. Nafitisize manzwi amatomolapilu kwa lubasi kakubulela kuli “Muamuhele kuli Mulimu kiyena yafa hape kiyena ya amuha. Libizo la Muña Bupilo lilumbiwe.”