Sâuǁkhāsib di ǁnās, ǁkhaeheǁoasase Covid-19 ǁōs xa ge tsâǀkhāheb !nâ 2020 !Khanna xu 2021 Gamaǀaeb kōse 13 683 sîsenga ge ǂoa!nâ. Ministeris sîsengu dis !gôakhâigu !oagun ge 12 238 sîsenaona mîǁguisa sîsenǀûs ǁaeb ai!â ǂoa ge kurib !nâ ge sîsenǀû kaihe, ǁnāpan ge 1 444 sîsenaona 2021 !khanni tsî Gamaǀaeb ǁaegu sîsenga ǂoa!nâse.

“ǀHaoǀhaosa !gôab sîsengu ge ǂoa!nân dib ge 12 238 sîsenaona !khōǂgā hâ 896 sîsenmā-aona xu, 1 !Khanni disa xu 31 Hôasoreb 2020 dis kōse, 1 444 sîsenaon 190 sîsenmā-aon xa 1 !Khanni dis 2021 disa xu 30 Gamaǀaeb 2021 dis kōse ge sîsenǀû kaihe hîa,” tis ge ministeris di ǂnûǁkhaeba ra sîsenǂuira direkters Lydia Indombosa ge mî. 

Indombos gere ǁgui!āsa !oan ge 10 773 khoena sîsenga ge ǂoa!nâ ,sâuǁkhāsib ǁnās tamas ka i o ǂharuguga ǂganams xa ge !aromahese. 

ǁAupexan ge 2 909 sîsengu ǂoa!nâde Covid-19 ǀkha !gaeǁaresa ūhâ, !gâi!gâ tsî-i Covid-19 ǀkha !gaeǁaresa ūhâse, ǁaeb ai!â sîsenǀû kaihes !gôa-e nē kurib !Hoaǂkhaiba tsî !Khaitsâb !nâ !nurihe tamase. 

!Nāsa sîsenǂoa!nâs ge ǀgapi !gôagu ǀkha a tsâǀkhā 3 !âgu ge !narisarimas tsî !gûkhoen!khaiga 4 105 khoen ge sîsenose. ǀGamǁî !khais ai xūkurus tsî ǁamaxūs !âba 1 707 khoen ǀkha, tsî maindi xa 1 266 khoen ǀkha saohe hâse.

Nau !âgu hîa ge ǀorose khoen sîsenga ǂoa!nâs xa a tsâǀkhāhegu ge ǂnuwiǁkhāsib tsî !gâi!gâisens (85), ǂans tsî ǁnâu-tsî-!hoaǂharugb (73) tsî ǁnān hîa aitsama a ǀhonkhoe-aisa omaridi tawa hân (5).  

Nau hâ ǂharugugu ge 484 tsî 758 ǁaegu hâ sîsenǂoa!nâde ge !nuri. !Nari!oabadi tsî loxistikn !âb ge 758 sîsenaona ge ǂoa!nâ, xūkurusa 708 khoena, !hū-omkhâis, !hanaǂgās tsî ǁau!khōsa 366, omkurusa 517, mariǁhōn tsî ûib ǁawoǁawosa 197,  ǁgau!nâsa 217, ǁnāpan 2 869 sîsenaona ǂgaihe tama !âgu !nâ sîsenga ge ǂoa!nâ hîa. 

Nē !gôakhâigu ge Kavangob Aiǂoas tsî Huriǂoas tsî Zambezib !nâ sîsenǂoa!nâs !gôaga ūhâ tama hâ. 

Oshikangos di ǂharugu-aob, Jafet Nakanueb ge ge mî, Covid-19 hās ǀkhab ge ǂharugubasens ûiba kaise a !gom tsî ǂkhawusa.