Namibiab ǁHûidi Ôa!nâ!nans (ECN) ge 15 khoena ǂganamsenaona xu ge ǁhûiǂui hîa nî ai!â hâ dî!nâǁgamǂǁaredi hîa ǂhaitsise nî ūhâ ǁhaose. 

Nēpa xu ga !gâi!gâ khoen ge nēsi a sîsenxa komisaren hîa ǁîn di sîsenǁaega nē kurib ra ǁnoro khami nî !gûǀamna nî !khō!khunise. 

!Nona komisaren hîa nē soadi !nâ hân di sîsenǁaegu ge 15 Taraǁkhumuǁkhâb 2021 dis ai ra !gûǀam. 

!Haosi ǂNûs mîgowaba-aob David Nahogandjab ge ǂoage Donertaxs ai ge mî, nē soadi ge ǂhôaǂkhanigu !nâ ǂanǂanhe hâ isa, tsîs ge ôa!nâdi komitesa ǁnā ge hâ i ǂganamsenaona xu 15 khoena a ǁhûisa hîa ǁari go ǂnôa-i Mantaxs di 9ir ǁaeb ai dî!nâǁgamǁaredi !nâ parlements tawa goro ǁhaose. 

Nē dî!nâǁgamǁaredi ge ǀhûhâsib khoen !aroma a ǁkhowa-amsa tsîs ge komitesa hoa dî!nâǁgam-aredi nî toas karao, o ǁkhaisa tamas ka i o ǁnās xa a ǀoro !gôab !gâi!gâxa khoen dide Presidenti ǁga aoǁguib ase nî sî!kharu, hîab ǁîba komisaren ase ǁnā !gôaba xu nî !gaena. 

Nē 15 khoen ge Maria Amupolos, Munolwisho Ipangelua, Francina Keendjeles, Emmerentia Leonards, Ndilimeke Mavulus, Elsie Nghikembuas, Andreas Masekeb, Viljo Ndapopiwab, Joram Rukambeb, Hendrik Tjibebab, Ellison Tjirerab, Rui Tyitende, Rachel Mundilos, Gerson Sindanob tsî Petrus van Zyl hâna. 

Nē kurib di ǀKhūǁkhâb !nâs ge ECNsa hoa soadi hîa nî ǀoaǀoahese ide !hū!nāsi ǂhôaǂhanigu !nâ ge !khoe kai, ǁîna gere ǂgaoǂgao!nâse ǂganamsende dī tsî ǁhûidi ôa!nâ!nans ǁanise ǂgâxa tsî ECNs aiǂnû-aos Notemba Tjipuejas, Ulrich Freyeri tsî Nghikembuab hâna !khō!khunisa, ǁîn sîsenǁaegu nē kurib Taraǁkhumuǁkhâb !nâ ra !gûǀam amaga. 

Tjipuejas tsî Freyer hâra ge nēsi 10 kurin khao!gâ ra sîsenxasiga ǀamǀam. 

Nē khoena xu nî !gâi!gâxase ǂoaxa ǀasa komisaren ge ǀnai hâ Gerson Tjihenunab tsî Evaristus Evaristus hâkha hîa nē ôa!nâ!nans ǁanise 2019ǁî kurib !nâ ge !gaehekha nî ǁhao. 

ǁHûidi ǂHanumās, 5ǁî ǂHanumās 2004ǁî kurib dis ge ECNsa ǁnāti ī ǀgaiba ra mā, îs !gâi!gâibasensa ga ūhâ khoena ǁkhauǂui in xoas !nâ-ū ǂganamsensa dī, ǁanin ǁhûidi ôa!nâ!nans din ase !gaehes !aroma. 

Nē ǁanisis ge koro kurigu xa !nāsa kurina !khōǂgā tide. 

ǁKhā ǂhanumās ge ECNsa ra mā-am îs ǂganamsen hâ khoena xu 10 khoen xa ǀoro tsî 20 khoen xa !nāsa tide khoena dî!nâǁgamǁaredi !aroma ǁkhauǂui.