Victoria Kaapanda

Omunamimvo 51 okwa si sho a li a dhengwa nodhimbo kukuume ke komutse momukunda Onaame moshitopolwa shaMusati.

Sha ikolela kuuyelele wa gandjwa komukuluntu gwopolisi moshitopolwa shaMusati Titus Shikongo, oshiningwanima shoka osha holoka oshiwike sha zi ko momudhingoloko Anamulenge. Otaku hokololwa kutya aalumentu mboka okwa li ya nyenyeta nagumwe pethimbo kwa li taya zi kookamba yu uka komagumbo. Okwa li ya tameke okukondja, sho naku tamanekelwa edhipago ndika a li a kutha odhimbo e ta dhenge nakusa kekothi yomutse,” ta hokolola ngaka. Ta ti, nakudhengwa okwa li a falwa koshipangelo mbala, hoka a li a ka hulithila Olyomakaya ga zi ko.

Natango kape na uuyelele wothaathaa kutya aalumentu mboka okwa li taya nyenyeta kombinga yashike. 

Omulumentu ngoka ta tamaneklwa edhipago oku na omimvo 48 a yambukile momukunda Onawa moshitopolwa shaMusati.

Opolisi oya kumagidha oshigwana shi hulithe po okwiilongela omiyonena uuna tashi nyenyeta.

“Hulitheni po okwiikuthila ooveta momake geni yene, ithaneni opolisi opo yi vule okukandula po uupyakandhi wu li pokati keni,” ta kumagidha oshigwana.

Ta ti, okudhengathana ihaku kwathele, ihe ohaku tula ashike gumwe muupyakandhi nenge gumwe a kanithe omwenyo gwe. Shikongo ta ti, oshigwana nashi kale shi na aluhe oonomola dhopolisi, opo ya lopote iiningwanima yoludhi ndoka, okuyanda omaso inaaga tegelelwa. – vkaapanda@nepc.com.na