Mwene gwehala lyimwe lyomanwino moshitopolwa shaMusati oku li moshipyu, sho pehala lye pwa dhipagelwa omuntu, sha ningwa pethimbo lya indikwa okulanditha iikolitha.

Otaku hokololwa kutya mwene gwehala okwa taaguluka oompango nomalandulathano ga tulwa po okukondolola omukithi gwocorona. 

Omukuluntu gwopolisi moshitopolwa shaMusati Titus Shikongo okwa ti, oshiningwanima osha holoka potundi 22h00 yuusiku momukunda Oniimwandi momudhingoloko gwaTsandi.

‘’Otaku hokololwa kutya aalumentu yaali okwa li ya kondjo nagumwe okwa dhipagwa sho ya tsaathana noombele Osoondaha ndjoka,” ta hokolola.

Ta ti, nakufekelwa medhipago ndika okwali a ithana nakusa pondje yondingosho, noya li ya tameke okukondja.  Nakusa okwa li a hili mo ombele nokutsa kuume ke. 

Nakufekelwa okwa li e mu tidha noku mu tsa nombele montulo, nokusa ethimbo olyo tuu ndyoka.

Otaku hokololwa kutya aalumentu mboka okwa li taya nyenyeta kombinga yokangodhi okashona kopeke.

Nakusa okwa tseyika nedhina Wilbard Shikongo Popyeni.

Aakwanezimo ye oya tseyithilwa.

Moshiningwanima inaashi faathana, omulumentu gwomimvo 45 okwa si sho a li a gu komulunga Olyomakaya.

Oshiningwanima osha holoka momukunda Oshuulo moshitopolwa shaShana.

Otaku hokololwa kutya omulunga ngoka  gu na uule wu thike poometa ndatu.

Aaakwanezimo ye oya tseyithilwa.