Opolisi moshitopolwa shaHangwena otayi indile oshigwana shi ya kongithe ko komulumentu gwedhina Jerobeam Nghinamhito, ngoka a li a dhenge kuume ke komiihole omanga e limetegelelo, e mu dhenge sigo omeso.
Sha ikwatelela kepeko lyopolisi oshiningwanima osha holoka Olyomakaya, nanakudhengwa okwa hulitha oshiwike shika.
Opolisi oya ti, oshiningwanima osha holoka momukunda Olukula moshikandjohololo shaKongo moHangwena.
Otaku hokololwa kutya omukiintu ngoka gwedhina Hilma Namupala okwa li a monika kaakwashigwana esiku lya landula, kee na oonkondo nokwa dhengwa shi nyanyaleka, omanga e li metegelelo.
Opolisi oya ti, Namupala okwa li a falwa koshipangelo shaKongo, e li monkalo ombwiinayi, nokwa li a ka tuminwa koshipangelo oshinene shaNandjokwe, hoka a ka hulithila Omaandaha gwoshiwike shika.
Aaholike mboka anuwa oya kala ye li mekwatathano lyopahole ethimbo ele, naashoka sha li sha eta oondjuma pokati kawo inashi tseyika natango.
Otaku fekelwa omulumentu ngoka a matukila moAngola, oshoka otaku hokololwa kutya oku na aakwanezimo ye ye li koAngola.
Opolisi oya kumagidha oshigwana shi hulithe po omahepeko goomeme momagumbo.
Tayi ti, ngele ope na uupyakadhi pokati kaantu ye li yaali, thikeni popolisi e tamu yakulwa nokukandula po uupyakadhi wu li po.
Ta yi kumagidha kutya, okwiikuthila ooveta momake ohaku eta omaupyakadhi ogendji, ngaashi gwokukuthathana oomwenyo.
Opolisi otayi indile oshigwana shi konge omakwatho aluhe uuna sha iyadha shi na uupyakadhi, kape na uudhigu ihawu kandulwa po.