Omulumenhu weedula 33 okwa kwatwa po eshi vati a dipaa nyamunghwawo ou kwa li ve li mekwafano lopaihole nomukainhu wavo. Oshiningwanima eshi osha ningwa mexuliloshivike komukunda Ongwenamulilo moshitukulwa shaMusati.

Nakufya okwa tongololwa oye Shaanika Efraim Shikongo omukalimo wokomukunda Okakundu.

Omukonakoni woimbuluma moshitukulwa shaMusati Omupedu Commissioner Moses Simaho okwa hokolola ta ti Shikongo okwa li e uya okutalela po ohonda yaye hai longo mondingosho.

Vati eshi kwa toka Shikongo okwa pewa eeshapi kohonda yaye opo a ye keumbo a ka kofe manga ohonda yaye ya teelela ovili yo23h00 opo a pate pondingosho.

Opolifi oya hokolola tai ti manga Shikongo a nangala okwa hangika mobashu komufekelwa ou e li naye vati mekwatafano lopaihole nomukainhu
oo.

Vati omufekelwa okwe mu tetaula nomakatana kofingo nomonhulo fiyo ta xulifa nokonima omufekelwa okwe mu kufa vali nongodi yaye yopeke.

Vati eshi omukainhu eshi a fika mobashu okwa hanga Shikongo a xulifa e li mexungu lohonde.

Okudja opo omukainhu okwa fekela kutya Shikongo oku na okukala a dipawa komulumenhu waye mukwao nokonima okwa lopotela opolifi.

Opolifi oya kala nokuninga omakonakono kombinga yomufekelwa fiyo ta hangika komukunda Olyasiti e na ongodi yopeke yaShikongo.

Omufekelwa okwa kwatwa po nota holoka momhangu yaKahao Etitatu eshi ta pangulilwa oshibofa shedipawo.

Ovakwapata vaShikongo ova shivifilwa efyo laye nomakonakono opolifi otaa twikile.

Omufekelwa oku na omido 33 a dile komukunda Okondaumwe koshitukulwa shaKunene.

– fhamalwa@nepc.com.na