Omulumenhu weedula 25 okwa fya konima eshi a tuwa nombele shaashi a vati a lundilwa kutya oha li po eembwa dovanhu momukunda.
Oshiningwanima eshi osha ningwa Osoondaxa efimbo lokonguloshi keendingosho momukunda Oshikondailongo moshitukulwa shaMusati.
Nakufya okwa tongololwa oye Kandele Shinendima Mbambi omukwashiwana waAngola, kwa li ha longo meumbo onga omulifi woimuna.
Omukonakoni woimbuluma wopolifi mOmusati omupedu Commissioner Moses Simaho okwa hokolola ta ti ovamemhu okwa li tava nu keendingosho di li pomukunda wavo.
Nokonima vati omufekelwa okwa lundila Mbambi kutya ohali po eembwa dovanhu momukunda wavo.
Okudja opo ovalumenhu ova tameka tava tanguna fiyo tave lidenge nokonima omufekelwa okwa kufa mo ombele yokapi ndele ta tu mukwao monhulo.
Opolifi oya hokoloa tai ti konima eshi nakuninga oshihakanwa a tuwa okwa enda okanano kashona a uka konima yondingosho nokonima okwe lidenga po fiyo ta xulifile ponhele opo.
Omufekelwa oku na omido 21 nokwa kwatwa po efiku tuu olo a longa oshimbuluma.
Ota holoka momhangu Etivali nomakonakono opolifi otaa twikile.
Opolifi oya kunghilila oshiwana opo shi xulife po okukala tashi lundilafana moinina ihe na oshi li shaashi osha nyika oshiponga neenghono.