Omulumenhu weedula 25 okwa yashwa okufya eshi vati a li ta lwifa omupolifi.

Oshiningwanima eshi osha ningwa mexuliloshivike molukanda Mix moWindhoek.

Nakufya okwa tongolwa Abaslom Absalom omukalimo womoWindhoek.

Omupopiliko wopolifi moshitukulwa shaKhomas Warrant Silas Shipandeni okwa hokolola ta ti Absalom okwa li tava ende nookaume kaye mepandaanda oufiku ve kwete omalodu.

Vati ovapolifi ova lombwela Absalom opo a xulife po okunwina omalodu momapandaanda ashike vati okwa kala ta twikile nokunwa omalodu.

Okudja opo opolifi oya umba ondjebo mombada nokonima omulumenhu oo okwa kufa odopi a hala okudenga ovapolifi.

Opolifi oya hokolola tai ti omupolifi umwe okwa umba ndele ta yashe Absalom monhulo ndele ta xulifile ponhele opo.

Omufekelwa ina kwatwa po natango onghee omakonakono opolifi otaa twikile.

Lwopokati opo, omulumenhu weedula 26 okwa lemanekwa eshi vati a tuwa nombele yokapi pefimbo kwa li tava tanguna pondingosho yoEmbassy mEenhana.

Opolifi oya ti oshingwanima eshi osha ningwa mexuliloshivike efimbo lokonguloshi.

Omufekelwa okwa kwatwa po notaholoka momhangu Etivali eshi ta pangulilwa oshibofa shonghendabala yedipawo.

Opolifi onghee ngaa tai kunghilile oshiwana opo shi xulife po okuya noilwifo keendingosho shaashi osha nyika oshiponga ngeenge omunhu a kolwa e na oshilwifo.

fhamalwa@nepc.com.na