Omulumenhu umwe okwa fya vati eshi a dengwa kovanambelewa vopolifi modoolopa Keetmanshoop.
Komufala wopolifi moshitukulwa sha//Karas Commissioner Marius Katamila okwa hokolola ta ti Elleste Plaatjie okwa hangika kovanambelewa vopolifi e kwete omapangwe oshivike sha dja ko.
Onghee vati okudja opo ovanambelewa ve li mongudu ova tameka okudenga omulumenhu oo, nokonima ove mu londeka motuwa yopolifi ndele tave mu tula moshana.
Opolifi oya hokolola tai ti okudja opo Plaatjie okwa ya shipangelo shaKeetmanshoop opo aka konga epango lopaunamiti.
Vati oshivike sha dja ko Etitano okwa tuminwa koshipangelo shepangelo shaKatutura moWindhoek fiyo ta xulifa Etine.
Opolifi oya hokolola tai ti Plaatjie okwa li a dengwa nai a ninga noipute kolutu laye.
Komufala wopolifi okwa ti ka pe na omunambelewa wopolifi a kwatwa fiyo opapa ashike opolifi oye li pyakidila nokuninga omakonakono kombinga yomadina ovanambelewa wopolifi ava vati va dengwa omulumenhu oo.
Eshi a kwatafana naKundana kakukutu wopolifi Inspector General Joseph Shikongo okwa ti olutu laPlaatjie ota li ka ningilwa omakonakono opo ku tali ke ngeenge okwa fya eshi a dengwa kopolifi ile pamwe okwa fya koudu umwe ulili.
“Konima ngeenge okwa monika kutya Plaatjie okwa fya eshi a dengwa, ovanambelewa wopolifi tava fekelwa kutya ova denga omulumenhu ou otava kala va kwatwa po diva,” Shikongo ta ti.