New Era Newspaper

New Era Epaper
Icon Collap
...
Home / A hokolola nkene ondholongo ya nawapeke onkalamwenyo ye… “Ye mu kutha momapandaanda, a ningi omunashilonga”

A hokolola nkene ondholongo ya nawapeke onkalamwenyo ye… “Ye mu kutha momapandaanda, a ningi omunashilonga”

2022-12-06  Victoria Kaapanda

A hokolola nkene ondholongo ya nawapeke onkalamwenyo ye… “Ye mu kutha momapandaanda, a ningi omunashilonga”

 “Omalovu okwa li ga piki ndje, ga halakanitha ndje noga li ga teyagulapo onkalamwenyo yandje, ihe konima yegeelo lyandje mondjedhililo onkalamwenyo yandje ngashiingeyi oye ya kondjila.

Risto Mbangula, omugundjuka, okwa li a lalekwa mondjedhililo kesilohenda, mondholongo ya edhiilla mboka ya monika ondjo yedhina Evaristus Shikongo ndjoka yi li ookilometa oonshona okuza moTsumeb moshitopolwa shaShikoto. Mbangula okwa li a pewa egeelo lyethimbo lyomimvo ne, ihe okwa li a kala mo ashike omimvo mbali, omol omayimbato ge. “Kakwa li oshipu, sho tango kwa li nda tumbulilwa omimvo ne moshipala shandje, omolwa oshikoya nda longele omimvo omugoyi dha piti, oshoka okwa li ndu uvite kutya ethimbo ele unene, oshipotha tashi undulilwa komeho, ashi vulike shi ka ekelelwehi,’’ ta hokolola ngaaka. Mbangula okwa nyenyeta nkene epangelo lyaNamibia hali kwata ethimbo okukonakona iipotha, shoka hashi shololitha aantu.

“Ondholongo kayi shi ehala ewinayi kukehe gumwe, ngaashi hatu yi tala ko, oshoka ngeno okwali ehala ewinayi ngeno onkalamwenyo yandje inayi galukila kondjila ngaashi nena, ihe ngeno nena kandishi kutya ondili monkalo yili ngiini,” ta popi ngaaka.

Ta ti, ethimbo a kala mondholongo okwali a ningi eyindilo lyiilonga yokufikila, nonando ka kwali ena ontseyo, ashike mokukala kwe, okwa kala omulumentu ena omutse hagu kwata mbala. Osikola ye okwali a huulile kiiputundhilo yopombanda, ashike onkalamwenyo ye yeyilongo oyali ya ningwa ohupi omolwa omashongo ngoka ali atsakaneke.

Ta hokolola ta ti, oshali ashike shemu pula oomweedhi mbali okushuwa okulonga iilonga yokoonyala, okupitila mooprogala hadhi gandjwa koondholongo dhoka dhina aantu ya pewa egeelo, onga oshitopolwa shokuhunga omwenyo aanandjo.

“Nena onda popyoka, ngame onkulungu mokufikila. Onda tameke oproyeka yandje pegumbo nonando kandina iikwathithi ayihe nda pumbwa, otandi kambandhala ngaa naashoka ndina po,” ta popi ngaaka. Mbangula ota indile wo kaasinamutima henda mboka taya vulu okumuyambindhindha naashoka ta pumbwa okuyambulapo oproyeka opo wo a vule oku kuta mboka yeli mompumbwe yiilongo oshowo okuya hila mo momapandaanda.

‘’Nena otandi pandula kutya onkalamwenyo yandje oya ninga ombwanawa, iikolotha ayihe nda kala noku longitha, kandina nando ohokwe nayo. Onda ndhimbulula, ashike ayihe mbika oya holoka omolwa ooprogalama ndhomashungomwenyo nda kala noku hita mondjeendhililo,” ta ti ngaaka.

Ta gwedhapo ta ti, ita pandula sho a kala mondjendhililo ihe ota pandula ooprogalama ndhoka dhemu yambindhindha okulundula onkalamwenyo ye, sho a zimo mondjila ya mbwalangandja. Sakaria Niivongo ngoka naye a li aningi omimvo heyali mondjeendhililo sho kwali a pewa egeelo lye, okwati, onkalamwenyo ye oya lunduluka omolwa ooprogalama ndhoka a kala ta hiti omanga eli meni. “Ondiilongo oshilongwa, onda ndhimbulula shoka shili mondjila oshowo shoka sha puka, oshowo okuhogolola ondjila yili mondjila,’’ ta ti ngaaka.

Niivongo okwati, nena okuna oshikunino shiikwamboga momukunda Oshitutuma moshitopolwa shaMusati, ihe uunongo mboka okwali ewu mono okupitila mooprogalama ali a pewa mondjeendhililo.

Omukuluntu gondjeendhililo yaanandjo Raphael Hamunyela ka kwali ta monika ethimbo ndyoka opo atyeko sha, kombinga yesimano lyoopoloogalama ndhoka

vkaapanda@nepc.com.na


2022-12-06  Victoria Kaapanda

Share on social media