Omimvo hetatu okuza sho a li a lundililwa okugandja uuzigo mboka anuwa wa dhipaga aalumentu aamwayinathana yaali, Martha Uutoni ota tsu omazima mokuyalula ayihe mbyoka a kanitha. 

Uutoni okwa li a mangwa po mo2014, ashike nonande mondholongo okwa kalele mo owala oomwedhi hamano, anuwa oshikumungu shika oshe mu kutha omaliko ge oshowo ondjokana ye. 

Uutoni (60) okwa li a iyadha konima yekumba sho anuwa a lundilwa komukiintu omutekulu gwomusaane gwe, Ndapandula Nghipumenye (48) kutya okwa pa Nghipumenye uuzigo e wu tula momalovu giilya. 

Aantu oyendji yomomukunda Epeko, moka kwa li hamu zi aakiintu mbaka, oyali ya iyadha koshipangelo, taya pangwa oshoka oyali ye na omandhindiliko taga ulike kutya oya fa ya lya uuzigo. Ashike aalumentu yaali, mboka ye li aamwayinagona yaNghipumenye kaya li ye na elago, ayehe yaali okwa li ya ehama nokusa esiku ndyoka. Sho a pulapulwa kaakwashigwana, Nghipumenye anuwa okwa li a ihokolola kutya oye a tulile aantu uuzigo momalomvu, ta ti okwe wu pewa kuyinakulu (Uutoni). 

Ehokololo ndyoka olya eta opo Uutoni naNghipumenye ya mangwe po. Nghipumenye anuwa ye mondholongo okwa li a kala mo omimvo mbali. 

Oshiwike sha zi ko, Ngipumenye anuwa okwa li a yi a kiihokolola nokugandja ombili koombelewa dhelelo lyaMbalantu, shaashi anuwa elundilo ndyoka a ningile Uutoni otali mu nyenyetele. Nghipumenye okwa li a lombwele onzonkundaneki ndjika kutya oye a dhungu omalovu giilya, ihe kakwa li a tula mo uuzigo nando, ye ina pewa sha kUutoni. 

“Onda li owala nda popi oshoka onda mbandamekwa. Okwa li nda kala tandi thindilwa kongudhi kaakwanezimo yandje, sho taya pula ndje ngele uuzigo inandi wu pewa kUutoni? Sho ya popi kutya otaya ka mangelandje momuti, omutse gwa taalela mevi omanga omagulu ga taalela mombanda, onda li nda mbandala e tandi zimine sho taya popi,” ta popi ngaaka. 

“Esiku olyo tuu ndjoka sho twa yi kondholongo, onda lombwele aapolisi kutya meeMartha ina pandje sha. Onda kala wo noku shi lombwela omukalelipo gwandje gwopaveta,”Nghipumenye ta gwedha po. 

Uutoni okwa hokolola ta ti, okukala mondholongo oomwendhi dha thika puhamano, okwa li a andha omaliko ge ga halakana po, sho omusamane gwe ngoka a li a kala naye okuza momumvo 1985 ka li e mu hala we omolwelundilo ndyoka. 

“Onda kanitha iimuna yandje, iilongithomwa yandje yopelugo, oshipululo, omashina gandje gokuhondja niinima yandje ayihe nda li nda likolola omanga ndi li mohombo,” ta ti ngaaka. 

Uutoni ngoka paife e li komukunda Okakekete mOmbalantu, okwa ti okwa li wo a adha oyana ya tidhwa mo megumbo. 

Otaku hokololwa kutya Uutoni okwa li a hokanwa komumwayina gwayina yaNghipumenye. “Nghipumenye okwa lundila ndje. Okwa lombwele ompangu kutya okwa li a lundile ndje sho kwa li a thiminikwa kaakwanezimo ye, kutya na tye ongame nde mu pe uuzigo. Okwa shangele ndje wo natango okambaapila kutya okwa li a popi ngaaka sho a li a mbandamekwa kutya ota dhipagwa ngele ita itaala kutya ongame nde mu pe uuzigo,” ta hokolola ngaaka. 

Nghipumenye moonkundathana noshifokundaneki shika okwa li a zimine kutya, ina pewa uuzigo opo a gandje kaamwayinagona. 

Omumwayinagona gwaalumentu mboka ya sa oshowo gwaNghipumenye, Paulus Angolo, ngoka taku hokololwa oye kwa li e lile komeho okumanga Nghipumenye noku mu thiminika a zimine okwa ti, kapwa li pe na omambandamako. 

“Inandi thiminika omuntu a zimine ihe okwa li a hokolola ye mwene kutya okwa pewa uuzigo kumeeMartha,’’ ta popi ngaaka. 

Ta ti, oshike e na okumbandamekwa, ngele okwa li ta hokolola ye mwene komeho gaakwanezimo ayehe? 

“Ndapandula [Nghipumenye] oye lela a tula uuzigo momalovu giilya, e wu pewa kumeeMartha [Uutoni],” ta koleke ngaaka. 

Ta gwedha po kutya aantu oyendji oya li ya yi kiipangelo sho ya nu uuzigo, ihe yamwe oya li ya ningi aanelago, kakele kaamwayinagona mboka yaali ya si. 

“Uutoni okwa kala nale nomahokololo omawinayi gokugandja uuzigo pomukunda. Noshiwike shoka natango okwa li kwa si omusamane gumwe pomukunda, taku fekelwa a pewa uuzigo kuye,’’ ta ti ngaaka. 

Oshiningwanima shoka anuwa okwa li sha holoka esiku aakwanezimo oshowo aashiinda kwa li yi ithanwa ya tumbe ondunda yaNghipumenye, nokwa li a dhungu omalovu esiku ndyoka. Omusamane gwaUutoni, Thomas Fabians okwa ti, oya topoka nomukulukadhi gwe omolwoshiningwanima shoka, ihe natango ope na omahokololo galwe ishewe ga gwedhwa po. “Onda li nde shi uvu nawa kuNdapandula kutya okwa pewa uuzigo komukukadhi gwandje. Shoka osha li sha mbandameke ndje, e tatu topoka,’’ ta hokolola ngaaka. 

O m u n a s h i p u n d i m e l e l o lyopamuthigululwakalo lyaMbalantu Agripine Kapiya okwa ti, ehokololo ndyoka oye li shi, ihe kakwa li lya pitikwa melelo lyopamuthigululwakalo. 

“Itatu vulu oku taamba aakintu mboka yaali ya paathane ombili mompangu yopamuthigululwoakalo oshoka ka kwa li ya lopota oshipotha shawo kutse,’’ ta fatulula ngaaka. Ta ti oya popi kutyaoshipotha shoka osha ekelwahi kompangu yepangelo. 

Ethano ota li ulike ashike 

vkaapanda@nepc.com.na