Op ol i fi mo s h i tu ku lwa shaKhomas otai konaakona o s h i n i n g w a n i m w a shikumwifa, omo omulumenhu vati a kwata onghonga ounona vavali vomido 12 vopoushiinda, nainagona yakamwe komounona.

Eshi oshiningwanima eshi sha ka dimbulukiwa, kamwe komounona oka hangwa nale ke li meteelelo loivike iheyali. Vati ounona aveshe ova kala hava patelwa monduda nokuhekelwa ouleke komufekelwa oo ha longo anga omushingi wotaxi. Pefimbo limwe vati ohe va ningile omatilifo, te va kufile mo ombele.

Opolifi moshitukulwa shaKhomas oya hokolola tai ti omukainhu ou e li onga omutekuli wokaana oko ka fimbapalekwa, naye vati okwa li a ningilwa omunyonena wopaixulo komulumenu oye tuu ou momudo 2007 ashike ka li a lopota oshibofa. Paife ovakwapata vokaana oko ka ninga eteelelo otava pula epangelo opo li kufe mo eteelelo.

Otava nyenyeta kutya okaana kavo okashona nokumona okaana kakwao na otashi dulika oukolele wako u ka piyaanekwe, ko ka li itaka ka dula okufila oshisho okaana, omanga nako ke li mefimbo lefiloshisho. Nakuninga oshihakanwa vati okwa kwatwa onghonga nokufimbapalekwa komushiinda shavo weedula 48.

Opolifi moshitukulwa shaKhomas oya koleka kutya okaana oka dimbululwa ke na eteelelo loivike iheyali konima eshi kwa li ka twalwa koshipangelo opo a ka ningilwe omakonakono. Vati nakuninga oshihakanwa okwa kala nokukwatwa onghonga oikando ya yooloka okudja omudo wa dja ko fiyo oneudo muAguste. Oshiningwanima eshi osha ningilwa molukanda Okahandja Park moWindhoek. Vati okaana eshi ka ningilwa omapulapuko kopolifi oka hokolola kutya oka kala nokuningilwa omatilifo komufekelwa kutya inaka lombwela omunhu.

Umwe womovakwapata okwa lombwela Kundana ta ti opolifi itai longo pauyuuki shaashi fiyo opapa inai kwata po omulumenhu ou taku fekelwa kutya oye a longa oikulumanene oyo. Okwa ti ke udite ombili eshi omufekelwa e li mokati kavo omanga a longela okaana kavo omunyonena wopaixulo.

Onghee ota indile opolifi opo i kale ya kwata po diva omufekelwa shaashi okwa tila pamwe otava ponokelwa komufekelwa eshi va lopotela opolifi kombinga yekwatonghonga.

Umwe ou e li omutekuli wokaana okwa lombwela Kundana ta ti okwa hala ouministeli woukashikekookanhu nonghalonawa yokaana opo u kale wa ya mo eenyala moshikumungu eshi diva. “Okaana ketu otaka kala taka mono oixuna yokunangalwa komufekelwa shaashi oke tu hokololela kutya oka kala nokukwatwa loikando ihapu,” ta hokolola.

Okwa hokolola ta ti vati tete oka kwatwa onghonga pefimbo eshi kwa li ka ya meumbo lomufekelwa taka pula omeva okunwa. “Omufekelwa vati oha patele okaana monduda yaye ndele ta i nako moixulo. Okwa kala ha kufile okaana ombele ta ti ngeenge oka popi eshi e ka ningila ote ka monifa oshiponga,” ta hokolola. Okwa ti ouyelele owe uya kombada konima eshi nakuninga oshihakanwa a lombwela umwe womuneumbo kutya ota ka vele koukainhu wako eshi ka iwa nako moixulo. “Okudja opo mumwainakadona okwe uya okulombwela nge nokonima yefimbo otwa lopotela opolifi diva ashike opolifi inai kwata po omufekelwa shaashi omakonakono inaa pwa okuningwa,” ta hokolola.

Okwa ti okwa li va twala okaana koshipangelo opo ka mone eyakulo lexungomwenyo noshoyo okukala ka pangwa. Eshi a kwatafana naKundana omupopiliko wopolifi moshitukulwa shaKhomas Warrant Silas Shipandeni okwa ti omufekelwa ina kwatwa po shaashi opolifi inai mana okuninga omakonakono natango.

Shipandeni okwa yelifa ta ti opolifi oye l pyakidila nokuninga omakonakono tete kombinga yoshikumungu eshi. A kumwifa koshikumungu eshi, omunawino woipambele youfemba womunhu Rosa Namises okwa ti opolifi nai kwate po omufekelwa ou diva shaashi itashi ulike efano liwa eshi e li mokati kovanhu.

“Opolifi nai longe pauyuuki. Omufekelwa na kwatwe po diva shaashi pamwe ota kala a longele ovakwapata oilonga yomunyonena,” Namises ta ti. Okwa ti kashi li mondjila omufekelwa eshi e na oibofa yomakwatonghonga ihapu ndele ina kwatwa po fiyo opapa. Okwa weda po ta ti ouministeli woukashikekookanhu nonghalonawa nau kale wa ya mo eenyala moshikumungu eshi. “Ounona vetu voukadona kave li vali meameno la wana eshi paife va ninga oihakanwa yokukwatwa onghonga,” ta ti.

fhamalwa@nepc.com.na