Indila e to pewa, konkola e to egululwa. 

Ndhoka odha popiwa komukiintu gwomimvo 29 Elise Micheal, a yambukile momukunda Oshali moshitopolwa shaHangwena.

Omukiintu ngoka okwa li a pula omakwatho moradio omumvo gwa yi, opo uunona we wuukwanambwiyu wu yambidhidhwe oshoka owa li moluhepo olululu.

Micheal okwa ti, okukambadhala okuvule okumwena, nuuna wu li muupyakadhi thikama e to pula omakwatho.

“Omukulu gwonale okwati, Kalunga ite ku pe uudhigu ito wu vulu,” ta ti ngaaka.

Ta ti, ota popithwa kenyanyu, ye  natango ota pandula oshigwana sho sha li she mu hupitha okuza monkalo a li muyo omumvo gwayi.

 “Omakemo gandje okwa li gu uvika mbala moshigwana, aanamutimahenda okwa li ya kwathele ndje okuza koombinga noombinga. Otandi pandula kehe ngoka a li a yambidhidha ndje nakehe shoka, Kalunga ne shi ya shunine iikando oyindji,” ta pandula.

Ta ti, okwa li a yambidhwa niikulya, omahini, iizalomwa oshowo oshimaliwa shoka a li a ningi ethimbo ti iyambidhidha nasho. “Okupula omakwatho kashi shi epuko, ihe otashi ti onda hulile muunyengwi sho nda kambadhala. Kehe ngoka e li muupyakadhi nenge e li moluhepo  thikama nena e to konkola piiyelo ayihe, oto egululwa,” Micheal ta kumagidha.

Ta ti, ngeno okwa li inaa pula omakwatho ngoka, ngeno aanona ye oya si ondjala nenge pwa holoka omapyaukadhi gamwe ga gwedhwa po.

“Aanona yandje yaakwanambwiyu oye na oomwedhi omugoyi nena, ihe oya thikithwa mpaka kwaashoka kwa li nda yambidhidhwa nasho okuza moshigwana,” ta ti ngaaka.

Micheal okwa ti, payife ota longo iilonga ye yomepya, moka a ikololela pethimbo ndika.

“Ngaashi ngaa nda popi kutya onkambadhala oyi vule okumwena, natango onda manguluka okulonga iilonga yokoonyala opo ondi vule okutula omboloto yaanona yandje poshitaafula,” Micheal a popi ngaaka. Omukiintu nguka okwa li a gwedha po ta ti, omaupyakadhi ga tya ngaaka ohaga vulu okuyonagula onkalamwenyo yomuntu, oshoka oho vulu okukwatwa komadhilaadhilo omawinayi, to ipula kutya oshike wu na okumona iihuna.

“Otandi kumagidha kehe gumwe e na omaupyakadhi ga yooloka, taga thiminike, thikama nena e to pula omakwatho, nonando ino mona ekwatho lyotango, olutiyali nenge olutitatu ino sholola, siku limwe kemanya naku ka za wo ontsi,” a kumagidha ngaaka.