Omukiintu gwomimvo 28 okwa si eso lyi nyanyaleka sho a tsuwa iikando oyindji nombele kukuume ke komiihole. Sha ikolelela komugandji gwomauyelele gwopolisi moshilongo Inspector Raimbert Muronga oshiningwanima shoka osha holoka molukanda Telecom moshitopolwa shaOtjozondjupa.
Otaku hokololwa kutya omukiintu gwedhina Aguste Jonas okwa li a tsuwa nombele iikando oyindji olutu aluhe. Omukiintu ngoka anuwa okwa li a tsuwagulwa sho anuwa a adhika nomulumentu gumwe mondunda yokulala komulumenhtu gwe omukulu. Shoka anuwa okwa li sha eta enyenyeto pokati kookuume mboka, nopethimbo lyiikolokosha, omulumentu ngoka okwa kutha ombele nokutsa omukiiintu ngoka.
Omukiintu ngoka anuwa okwa si ethimbo olyo tuu ndyoka. Iiwike iyali ya piti aakiintu okwa li ya dhimbulukwa esiku lyoomeme lyopaigwana ndyoka hali dhanwa aluhe momasiku 8 Maalitsa muuyuni.
Esiku ndyoka okwa li lya gongele aakiintu okuza momindhingonoko dha yooloka, nokwa li ya gandja omanyenyeto gawo omolwomahepeko taya ningilwa, taya ti, inaya manguluka we.
Oomeme okwa li ya yelula omapalakata gawo nomashangelo otaya indile uuthemba waakiintu nuunona wu simanekwe nomahepeko ga hulithwe po. Momukanda gwawo gwomanyenyeto, oomeme mbaka otaya ti kutya nonando pwa ningwa ooveta ngashi ndjoka yi na sha nomakwatokoonkondo naandjoka yomahepekathano gomomagumbo, omakwatonkoonkondo goomeme nuunona onkene ngaa taga tsikile, go omahepeko goomeme nuunona nago onkene ngaa taga tsikile, ngashi taku uhala taku kundanwa miikundaneki nosho tuu.
Opolisi yaNamibia oya kumagidha oshigwana shi hulithe po omahepeko goomeme momagumbo.
Tayi ti, ngele ope na uupyakadhi pokati kaantu ye li yaali ye li mekwatathano lyopahole naya kale taya thiki popolisi e taya yakulwa opo ku vulwe okukandulwa uupyakadhi wu li po.
Tayi kumagidha kutya, okwiikuthila ooveta momake ohaku eta omaupyakadhi ogendji, ngaashi gwokukuthathana oomwenyo.
Opolisi otayi indile oshigwana shi konge omakwatho aluhe uuna sha iyadha shi na uupyakadhi, tayi ti kape na uudhigu ihawu kandulwa po.
Ya gwedha po kutya olundji oomeme oya taalela uupyakadhi wokukuthwa oomwenyo kookuume kawo yopaihole momikalo dhi nyanyaleka.
Opolisi okwa li ya popi ngaaka sha landula oshiningwanima shedhipago shoka sha holoka Osoondaha kOkahandja.
– vkaapanda@nepc.com.na