Omulumenhu weedula 35 okwa monifwa oshiponga eshi a tuwa nombele yokapi ku kaume kaye.

Oshiningwanima eshi osha ningwa mEtivali potundi 15h00, pefimbo ovalumenhu ava vali tava tanguna poundingosho vedina Oshimwandi, veli momukunda Onanghuulo moshitukulwa shaHangwena. 

Omupopiliko wopolifi mOhangwena Inspector Kauma Itumba okwa hokolola ta ti ovalumenhu ava okwa li tava tanguna efimbo lomutenya poundingosho. Nokonima omufekelwa okwa kufa ombele yokapi ei kwa li a homata ndele ta tu kaume kaye mombuda, omo vati mwa ninga ombululu ya kula.

Itumba okwa ti nakutuwa okwa twalwa koshipangelo shepangelo shaEenhana, notaku hokololwa kutya okuli monghalo ili xwe po paife.

Omufekelwa oku na omido 28, nokwatwa po kopolifi efiku a longa oshimbuluma. Ota kaholoka momangu yamengestalata
yaEenhana nena.

Itumba okwa kunghulila oshiwana opo shixulife po okukala tashi tanguna ngeenge shanwa omalodu shaashi oshi li sha nyika oshiponga neenghono, yee ta weda po ta ti ovanhu i na vapumbwa okukala vaumbata eembele ngeenge tava i keendingosho.

Lopokati opo Inspector Itumba okwa hokolola efyo lomulumenhu weedula 44 a fya eshi alyatwa kotuwa efimbo lokomatango Etivali mondjila pokati kaEenhana nOshigambo pomukunda Onakatumbe moshitukulwa shaShikoto.

Nakufya okwa tongololwa oye Theofilus Wakanana omukalimo womomukunda Onakatumbe.

Itumba okwa hokolola ta ti Wakanana okwa li ta shingi ombashikela onghee okwa ka dja otuwa yoToyota itoka ndele tai mu lyata noku xulifila ponhele opo.

Okwa ti omushingi wotuwa ina kwatwa po shaashi eli efyo li eshi loshininga wina. 

Ovakwapata naWakanana ova shiivifilwa efyo laye, nomudimba waye owa twalwa kokila yoshipangelo shaEenhana.