Aanamapya monooli oye li momalimbililo molwaomuloka tagu ende kashona. 

Oomvula odhindji pethimbo ngandika oyendji ngeno oya tameka nale okulima. Ihe sigo onena omambakumbaku inaga tameka okulima momikunda. Omimvo dha zi ko, ku tumbula nande 2019, iitopolwa oyindji unene konooli, okwali ya dhengwa pevi koshikukuta, shoka kwa li sha thigi oyendji mondjala noluhepo. Iimuna oya sile po noonkondo, omanga aalimi yomapya yamwe kaya li ya ya mo momapya nando. Omumvo gwazi ko shiyenga oya li ye ya ethimbo lya pwa po naanafaalama yamwe inaya vula okumona mo sha momapya nande yamwe oya li ngaa ya likola mo. 

Nonando aanongononi yokutala ombepo moshilongo petameko lyaKotomba okwa li ya pititha kutya nuumvo oku na omuloka omwaanawa, aanamapya otaya ende taya teka omukumo. Kaino Shiyagayaya gomomukunda Okando moshitopolwa shaMusati okwa ti ethimbo ndika shito ngeno ombunda oya lala nale, omatemo ngeno otaga indhenge nale kumwe. “Iilya yetu ngeno owu yi wetele okuza kokule sho ya ziza nawa, ihe sigo onena evi olya kukuta ashike,” ta popi ngaaka. 

Ta ti, nonando ye na ngaa omukumo kashona kutya onayi ke ye ngaa oshoka egulu inali nyayika, omukumo otagu ende tagu yi pevi kehe esiku. Esther Shilongo gwomomukunda AkweenyangamOngwedivaokwa popi ta ti, oyendji koombinga noombinga otaa lili omvula ya kala ko noonkondo, ye na uumbanda kutya otayi ya tuu nenge ahawe, omanga yamwe taa ti kutya edhina lyayo otayi ya. Oshitopolwa shaHangwena, Oshikoto, Omusati oshowo ombinga yiwe yOshana, omvula oya li ya dhenge mo omata omashona omathimbo ga zi ko, ihe molwaashoka evi olya kukuta, omeya ohaga ponwa po ashike koonte dhetango oshoka omutenya ogwa pimbila. Omukulupe gumwe a yambukile momukunda Ekulo moshitopolwa shaShikoto, Selma Nashiko okwa li a hokololo nkene omvula hayi ka talwa kEwale uuna itaayi loko. 

“Nkene tatu putuka omvula ohayi ka talwa uuna ya kala ko. Ope na omilandu hadhi landulwa kwaamboka ye na uunongo opo omvula yi loke,” ta fatulula ngaaka. Ta gwedha po kutya mongashiingeyi oshilongo shika oshi na iinima oyindji ya lundulukaomolwuukriste.“Kandi na we ontseyo ngele natango ohashi ningwa moshilongo shetu muka, ihe osha kala ko. Omvula mOndonga oya kala hayi ka talwa kAakuusinda, mboka yezimo lyetu,’’ ta ti ngaaka. Ta popi ta ti, mboka ya kala haye shi ningi oya hula ko onkene kaku na we ngoka e na uunongo mboka woku shi ninga. 

Nashiko okwa ti koAngola oshinima shoka ohashi ningwa natango, oshoka mboka ye na uunongo mboka oko ye li natango.