Nonando sha kala uupyakadhi kombinga yiiyenditho omimvo dha piti uuna aanuushimba taya shuna komalukalwa gawo, omumvo nguka oshi li hwepo. Aahingi yoondjila oonde okuya kiitopolwa ya yooloka okuza mOshakati, otaya nyenyeta omukithi gwoCovid-19, kutya ogwe ya shunitha monima noonkondo.

Omuhingi gwokambetsa, ngoka ha hingi pokati kOshakati nOvenduka Samuel Samuel, okwa ti okwa ninga oomvula dha pita 15 ta hingi, ihe omvula ndjika itayi yelekwa noonkwawo.
“Ndika olyo ethimbo hatu ningi iimaliwa, ihe nuumvo inashi faathana. Aantu oyendji kakwa li ye ya komafudho nuumvo omolwa uutile womukithi gwoCovid-19,” Samuel a popi ngaaka.

Ta ti,  shito  ngeno omasiku sho taga ka thika momulongo nasha, oku za 01 lyaJanuali, okwa longa nale oshimaliwa sha thika N$10 000.
Kundana sho a li a ningi omapekaapeko pokapale mpoka hapu londolwa uubetsa, omayinyengo gaantu omahwepo.

Aantu itaya kondjele we omahala moobetsa, shoka tashi ulike kutya nuumvo aantu kaye shi oyendji. Lydia Kadhila ngoka ha landitha uukwashikependjewo pehala mpoka okwa ti, aanuushimba paife oya kotoka, oyendji ohaya shuna konima yokili omanga omumvo omupe inaagu adha. “Oyendji ohaya shuna mbala oshoka omasiku gahugunina ohaga kala ge na aantu oyendji shoka hashi etitha ya kale mOwambo omasiku ga pitilila nokufawula kiilonga,” Kadhila ta popi ngaaka. Omufaalelwa gumwe ngoka edhina lye lyishiwike kuKundana okwa ti, nuumvo otaya pandula oshoka itaya lalele we oobetsa, oshoka iiyenditho oyindji.

“Natango otatu pandula, oshoka nuumvo otatu kuthilwa ko koofuto uuna ino gwanitha, shito ohatu futithwa iimaliwa ya pitilila ethimbo ndika lyaJanuali,”omufaalelwa a popi ngaaka.
Ta gwedha po ta ti, tango okwa li a pulwa a fute N$350 nonando ke na oondjato odhindji, sigo apula a kuthilwa ko a fute N$300.
Ta ti, shito ngele ino gwanitha iimaliwa mbyoka tayi pulwa, oho thigwa po ashike.