Aafuthi nayo ngashiingeyi otaya endele pamwe nethimbo, noye li taya longitha omikalo dhi ili nodhi ili opo ya yuge oshigwana iimaliwa.
Moshiningwanima oshitalala, aalumentu yeli yatano oyali ya iningi aapolisi yiifundja, mondjila onene yuuka kEndola, pomukunda Omavela.
Sha ikolelela komugandji gomauyelele gopolisi moshitopolwa shaShana Thomas Aiyambo, aalumentu mboka okwali ya kankameke ohauto yomuAngola gumwe ngoka a li mo nOmunamibia gumwe mohauto.
Otaku hokololwa kutya omulumentu ngoka Omunamibia okwali a dhimbulula kutya aantu mboka kayeshi aapolisi yoshili no kwali ya ndhengele opolisi meendelelo.
Yatatu yomaafuthi oya mangwa po omanga yaali ya matuka po.
Shoka okwali sha ningwa sha faathana noshiningwanima shoka, sho aalumentu yaali ya li ya ponekele ehala lyomayinyanyudho oshowo lyokuvulukwa tali ithanwa Ongwediva Junior Hotel, moka aafuthi ya kengelele
aaniilonga kutya yo aapolisi yaNamibia.
Ta hokolola ta ti oshiningwanima shono osha li sha holoka mOngwediva.
Ta ti aalumentu mboka sho ya li ya gandja ehokololo kugumwe gwomaaniilonga ngoka ha gandja omayakulo gotango okwa li a mono kutya aalumentu mboka ookalyamupombo.
Nonando ya li ya zala oshinambelewa lela notaya monika yafa aanashilongo shili, omuniilonga ngoka okwali a dhimbulula kutya ookalyamupombo oshoka kaye na nando uuthemba tawu ulike kutya yo aapolisi.
Otaku hokololwa kutya omuniilonga ngoka sho a dhimbulula kutya kaye shi aapolisi yoshili okwa li a ningi onkambadhala yekwatho lyomeendelelo, ashike ookalyamupombo oya li ye shi dhimbulula kutya otaya lopotwa ee taya thigi po ehala meendelelo.
Aalumentu mboka oya li taya hingi ohauto ontokele yoToyota Dakar yonomola yaWindhoek, ashike onomola yohauto inayi monika nawa oshoka ohauto oya li ya thikamithwa momilema.
Aiyambo okwa kunkilile aakwashigwana kutya aapolisi yaNamibia oye na omandhindhiliko ngoka ga tseyika nawa mokati koshigwana.
“Aapolisi yaNamibia oye na omandhindhiliko ngoka ge shiwike koshigwana, oye na iikutu yiilonga, nongele aakonakoni ngaashi aafuthi mboka ya li ya hala okukengelela aanilonga mboka, kehe omupolisi gwomukonakoni oku na okukala a humbata okamutse kiilonga hoka taka ulike kutya omupolisi gwaNamibia shili ethimbo kehe,” Aiyambo ta ti ngaaka.
Aiyambo okwa li a kumagidha
oshigwana ta ti ngele ya mono omayinyengo taga limbilike naya kale ya dhengela opolisi koonomola dhosheendelelala tadhi landula: 0813630666 Oshakati, 0813873555 Ongwediva, oshowo 0814029009 Ondangwa. – vkaapanda@nepc.com.na