Aakaleli yaanumvu moshipangelo shaShakati oya nyenyeta kutya oya hala olukalwa ihaalu futwa, oshoka haayehe yena iiyemo.
Aakaleli yaanumvu oshowo omeme yeli momategelelo oya pewa olukalo metungo lyi li po pepi noshipangelo ta li ithanwa Waapandula noyaka, moka haya futu N$5 mesiku.
Omukiintu gumwe a kalela yina edhina lye lishiwike kuKundana okwati, otaya mono ihuna omolwa N$5 ndyoka haya futu mesiku.
“Kandina iiyemo ya sha, inaandadha okukwata openzela. Iimaliwa andiyi kutha peni kehe esiku,” ta pula ngaaka.
Ta ti, okwaza kEehnana eya okukalela yina, ngoka aningi omwedhi paife moombete.
“Ondina okulanda iikulya ya meme yo kulya oshoka ihali kehe shimwe oshowo okulya kwandje mpaka ndili,” ta popi ngaaka. Ta gwedhapo ta ti, oshihwepo ngele epangelo ta li tungile oshigwana egumbo lyaakaleli yaanumvu, ndoka ta li kala ihaali futwa nenge lyi kale ha li futwa oshimaliwa shili hwepo komwedhi.
“Sho ndili mpaka kehe shimwe tandi longo otashi pula oshimaliwa, ota tu mono ihuna,” ta ti ngaaka.
Monica Kasutu ayambukile kOpuwo okwati, ota pandula oshoka ita lala momapandaanda, ashike uuyogoki mehala uupyakadhi.
“Out li pethimbo lyomukithi gwocorona, ihe aanilonga ihaya opaleke oomatalashe noombete, omanga inamuya omuntu omukwawo,” ta nyenyeta.
Ta ti, oshanika oshiponga oshoka aantu oya za kiitopolwa ya yooloka nomukithi otagu vulu okutaandela nawa momukalo ngoka.
Maria Natangwe okwati, ye okuuvite ombili oshoka okwa kwathelwa nolukalo niimaliwa mbyoka hayi futwa oyishi okwiindhidhimikilwa.
“Kiipangelo yimwe aakaleli otaya futithwa imaliwa ya pita po N$5, onkene itandi tuku Kalunga, ta pandula.
Omuniilonga gumwe pehala mpoka okwati, ehala ndyoka olya tungwa po mo2006.
“Ohatu kambadhala oku opaleka poompito adhihe, ihe metungo muka ohatu taambele mo omuhoko kehe,” ta hokolola.
Ta ti, ngaashi sha shuwika nawa kutya omihoko nomithigululwakalo odha yooloka.
Ta ti, yamee otaya popi kutya yo ihaya iyogo komalutu, onkene pehala mpoka ohaya thigi po pwa nigila.
“Oshinakugwanithwa shaangoka tayi pehala mpoka a opaleke po,” ta popi ngaaka.
Omuniilonga ngoka okwali afatulula kutya N$5 ndyoka odho dha kala hadhi futwa okuza omumvo etungo ndoka lyeyapo sigo onena.
“Miimaliwa moka omo hamuzi okufuta omeya, olusheno oshowo oofuto dhetu noompumbwe dhilwe,” ta fatulula.
Natango okwali ayelitha kutya ethimbo ndika lyocorona omwaalu gwoku taambelamo aantu oyegu shunitha pevi, okuyanda omangudumano.
Omukuluntu gwoshikondo shuuhaku moshitopolwa shaShana Johanna Haimene okwati sigo ompaka inaya tengeneka okutungila aakaleli egumbo. “Etungo ndyoka lyili po kali shi lyepangelo olyo pawumwene,” a yelitha ngaaka.