Aakalimo oyendji moshikandjohogololo shaKatyali moshitopolwa shaShana natango otaya nu omeya inaaga yela.

Kansela gwoshikandjohogololo shaKatyali Joseph Mupetami okwa ti oye li mompumbwe okuyambidhidhwa nomiti dhoku opaleka omeya miishana nomomithima ngoka haga longithwa kaakwashigwana kehe esiku.

“Otu li nale muupyakadhi womukithi gwocorona, ihe natango oshigwana otashi nu omeya inaaga yela. Otatu indile kuuministeli wuundjolowele wopetameko wu tu yambidhidhe opo tu opaleke omeya ngoka ga vongoka,” ta popi ngaaka.

Mupetami ta ti, omagumbo gaayelele ogendji kage na uupomba womeya.

Ta gwedha po ta ti, oshowo mboka kaaye na iiyemo, ya vule okufuta omeya poopomba mpoka haya teke, onkene ohaya thiminikwa oku ka teka omeya komithima.

“Omeya ngoka inaga yela, inaga pumbwa okulongithwa kaakwashigwana ge li ngaaka. Otatu indile opo tu yambidhidhwe nomiti ndhoka, opo tu vule oku ga opaleka go ga vule okulongithwa nawa,” Mupetami a popi ngaaka. Ta ti, oya kala nokuyambidhidhwa kuuministeli wuundjolowele, ihe omathimbo ogendji ya kala nokushuna ko ohaya adha omiti dha pwa ko. Jonas Kashimba gwomoshikandjohogololo Okatyali okwa ti oya kala nuupyakadhi mboka ethimbo nuule, taya longitha omeya inaaga yela. “Omeya ngoka ohaga longithwa iilonga oyindji kaantu oyendji. Omo hatu kutha omeya gokunwa, okuteleka oshowo okwiikoha. Yamwe mboka kaaye na ko nasha oto dha taya yogo iikutu yo taya shuna mo omeya, shoka tashi etele aakwashigwana omikithi dha yooloka,” ta popi ngaaka.

Ta gwedha po ta ti, oshigwana oshi li muupyakadhi okukwatwa komikithi dha yooloka, tadhi zi momeya ga kaka, onkene oya pumbwa uupomba womeya momikunda kehe. Jonas okwa ti, ohaya kala ya pulakena Kansela gwoshikandjohololo shawo sho te ya kondjele, ihe epangelo itali eta omalunduluko gasha. 

“Otwa pumbwa omeya ga yela unene ethimbo ndika lyomukithi gwocorona. Itatu vulu okukala tatu longitha omeya ga kaka, ngele oongaga odho ta tu keelele. Eyooloko olyi li peni?” Ta pula.