Aakuluntu yena aalongwa ya kwatwa “kOkakombo” kosikola Oshakati West Primary oya kumagidhwa ya ikalekele aanona omanga taya ti po hwepo. Omukuluntu mbelewa guuhaku moshipangelo shaShakati Josephine Kanyama ngoka a li a koleke omukithi gwOkakombo posikola Oshakati West, okwa ti, oshipotha sho tango okwa li sha monika iiwike iyali ya piti.
Ta ti, elalakano lyaanona ya ikalekelwe omanga ye li komagumbo, okukeelela aanona mboka ya kale mekwatathano naanona yalwe, omukithi ngoka gutaandele moshigwana. “Uuministeli wuuhaku nonkalo nawa, Omaandaha okwa li wa tumu aapangi kosikola hoka okukandolola onkalo,’’ ta ti ngaaka. Ta ti, iipotha yi li 24 okwali ya ndhindhilikwa posikola mpoka, omanga ye li yahetatu yomuyo kwali ya kalekwa komagumbo. Ta gwedhapo ta ti, aanona ye li 16 okwali taya ulike omandhindhiliko gOkakombo.
“Uuministeli otau tsikile okukondolola onkalo. Owa gandja wo omiti ndhoka dha pumbiwa notau ka gandja uumasika opo kukeelelwe omukithi ngoka gu taandele unene.
Kanyama okwa kumagidha wo aakuluntu yena aanona ya kwatwa kOkakonmbo ya fale aanona koshipangelo ngele itaya ti po hwepo. Omulongi gumwe posikola Oshakati West Primary Vylla Coimbra okwa ti, onkalo otayi kondololwa pamikalo adhihe. Ta ti, omukithi ngoka otagu indjipala, nonando hakehe esiku. ‘’Oshipotha shotango okwali sha monika mokati kaFebuali nuumvo,” ta ti ngaaka.
Ta ti, natango opena aanona yalwe inaaya ndhindhilikwa oshoka oya ningi omasiku kosikola inaaye yako nomatempelo inaaga shuwika natango. Coimbra ta ti, opo taya landula aanona mboka kutya oshike sheya fawulitha kosikola omasiku ngoka. ‘’Otwa tameke okugandja omalongo nkene aanona yena okwiikelela komukithi nguka oshowo nkene yena okwiihumbata opo kaagu taandela,” ta fatulula ngaaka.
Sha ikolela kehangano lyoWorld Health Organization (WHO) Okakombo ohaka kwata unene aanona aashona oshowo mboka yeli momimvo dhopokati. Olya ti, Okakombo okandhindhikilwa ashike maantu, hoka haka taandale pamukalo gomakwatathano nenge okuza mekwatathano lyoondjahi. Ta ti, Okakombo okena omandhindhiliko ga yooloka nuunene oohaka ulike ozindo okuza mothingo okuya koompanda. vkaapanda@nepc.com.na