Victoria kaapanda 

Aakwanezimo yokanonamati Elago Kiinge (14) otaya indile moshigwana shi lopetele opolisi yi li popepi nenge aakwanezimo uuna ye ka tsakaneke. Hekulu yaKiinge, Jesaya Johannes okwa ti, kehe ngoka ta ka tsakaneka okanonamati hoka ne ya lopotele meendelelo.

“Kiinge okwa li a thigi po egumbo ongula yOlyomakaya sigo onena ina galukila kegumbo, ye kakwa li a popya mpoka ta yi,” ta ti ngaaka.

Ta hokolola kutya okanona hoka oka li ka thigwa megumbo ongula nokamwayinamati, hoka a li a thigi wo natango puushiinda.

“Oshe tu tula momalimbililo kutya oshike shi na oku mu kutha mo megumbo, oshoka kakwa li a nyenyeta sha puyo, ngeno she mu uvitha nayi,” Johannes ta ti ngaaka. 

Ta gwedha po kutya ongula yEtiyali okwa li ya lopotelwa kutya okwa li a monika popepi nosikola Oniipa Primary School, mpoka naye ha hiti, ihe okwa li a matuka po sho a li i ithanwa.

Natango anuwa okwa li a monika ongula popepi nomagumbo mpoka ha zi, ihe okwali a lombwele aashiinda kutya ota yi kuyinakulu, ngoka taku hokololwa kutya oku li kOmuntele.

Johannes okwa ti oye li momakwatathano naakwanezimo ayehe ihe kape na hoka a thiki.

Kehe ngoka taka mona okanonamati hoka na dhenge konomola  081 6032 707

Nenge 0814746 197

- vkaapanda@nepc.com.na