New Era Newspaper

New Era Epaper
Icon Collap
...
Home / Aaleli moshitopolwa shaShana ya talela po Uuvudhiya

Aaleli moshitopolwa shaShana ya talela po Uuvudhiya

2021-08-27  Victoria Kaapanda

Aaleli moshitopolwa shaShana ya talela po Uuvudhiya

Victoria Kaapanda

Ngoloneya gwoshitopolwa shaShana Elia Irimari opamwe nookansela ya yooloka yomoshitopolwa shaShana oya li ya talele po oshikandjohogololo shUuvudhia oshiwike sha zi ko.

Kansela gwoshikandjohogololo ShUuvidhiya Timoteus Shivute okwa ti etalelepo lyaaleli moshikandjohogololo she, okwa li lyi na sha nomaupyakadhi ga taalela oshikandjo oshowo omatokolo ge na okuningwa po.

“Lyimwe lyomuupyakadhi epeya, ndyoka hali hanagula po omalundu, iimuna oshowo omagumbo gaantu. Uuministeli wiihwa okwa li wa tokola okupulula omwiidhi ngoka hagu kwata omulilo mbala.” Ta ti ngaaka.

Ta gwedha po ta ti, aanambelewa yokoministeli yiihwa otaya longo lela ya itula mo, naashoka ya tula miilonga osha simana, okuyanda omaupyakadhi monakuyiwa.

Shivute okwa ti, osheendo shoka shetalelopo lyoshikandjohololo okwa li sha tsikile sigo okombinga yuulithilo hoka ya ka mona kutya ondhalate yEtosha oya yonagulwapo, mpoka hapu pitile iiyamakuti yomomithitu.

“Shika osha kala hashi eta omaupyakadhi pokati kaantu oshowo iimuna mbyoka hayi lika po kiiyamakuti. Aanafaalama yiimuna oyendji oya kanitha iimuna yawo omolwa tayi lika po,” ta popi ngaaka.

Kansela okwa ti, Uuvidhiya oshikandjo shimwe shomiikwawo shoka shi na omauyamba ogendji gopashitwe.

Ta ti, muule wethimbo efupi, okwa tengenekwa okuhumitha komeho oshikandjohogololo shoka, shoka tashi ka humitha komeho eliko lyoshilongo nuunene moshitopolwa shaShana.

“Omaupyakadhi agehe ngoka okwa li ga tothwa mo noga tulwa miilonga nkene ge na okukandulwa po,” ta fatulula ngaaka.

Ngoloneya Elia Irimari okwa kala nokupopya kutya oshitopolwa shaShana oshi na eliko momikalo odhindji, okuza kuushitwe oshowo oku eta po oshimaliwa.

“Oshitopolwoa shaShana oshi na uushitwe owundji, mboka wa pumbwa okutulwa miilonga ee tau longithwa nokuyambulitha po oshitopolwa shaShana,” ta popi ngaaka.

Ta ti ngele a tala oshikandjohogololo shUuvudhiya, okwa fa a tala okawe koshimaliwa oshoka uushitwe owundji omo wu li. 


2021-08-27  Victoria Kaapanda

Share on social media