Minista gwelongo Anna Nghipondoka momushangwa a pititha kombinga yiizemo yekonaakono Grade 11 no12 dhopombanda okwa ti, mboka inaaya gwanitha iitsa opo ya vule okuya kondondo 12 inaya ndopa.
“Sha ikolelela komulandu ngoka wa tulwa po, aalongwa oyena okumona oopelesenda 81 opo ya vule okutsikila kondondo ontimulongo 12, ashike itashi ti oya ndopa,” ta fatulula ngaaka.
Ta ti, maalongwa ayehe ye li 46 977 ya nyololula ekonakono lyondondo 11, aalongwa ashike yeli 8 817 ya gwanitha oopelesenta 81%.
“Omilandu dhali hadhi longithwa okuhinga elandulathano lyoondondo ndhoka dhopombanda, olyali lina uupyakandhi owindji,” ta ti ngaaka.
Nghipondoka okwa ti, omilandu nomalandulathano omakulu oga li ga fala aalongwa oyendji momapandaanda, noya thigi po oosikola omolwa iitsa ya tulwa po inaaye yi gwanitha.
“Momilandu omikulu aalongwa okwali haya nyolithwa ekonakono lyoJunior secondary national examinations, ihe ohaya ka pewa oonzapo dhojunior secondary certificates mondondo 10,” ta fatulula ngaaka.
Ta ti, shoka okwali hashi thiminike aalongwa inaaya gwanitha iitsa 23, ya thige po oosikola, oshoka itaya vulu okutsikila nondondo 11.
Ta gwedha po ta ti, sho shoka oyendji yali ya huulile ondjila kati, nonena kaayena iilonga omlwa inaaya mana eilongo lyawo.
“Aalongwa yondondo 11 mboka yena ehalo lyokuiigwedhelako , omolwa inaaya gwanitha iitsa mbyoka, sha ikolela komilandu tadhi hingi oondondo ndhoka, aalongwa oyena okukutha iilongwa yathike pwiine,” ta popi ngaaka.
Minista okwatothamo wo kutya, uuministeli welongo owali wa taalele omaupyakandhi ga yolooka omvo gwayi, sho kwali wa longitha oshimaliwa oomilliona 15 okunyololula ekonakono ndyoka kwali lya yakwa.
Okwali wo natango a pandula aalongwa mboka kwali yeshi enditha nawa miilongwa yi li ihamano, ya zi miitopolwa itano, Hardap, Kavango gokuuzilo, Erongo, Khomas oshowo Oshikoto.
– vkaapanda@nepc.com.na