Omukuluntu gwelongo moshitopolwa shaShana Hileni Amukana okwa kumagidha aavali oshowo aayambidhidhi yelongo opo ya kale taya indhopo miinyangandhalwa yaalongwa.
Amukana okwa li a popi ngaaka esiku lyoshigongi sha li shi na sha nokukundathana nkene aalongwa ye na oku Itula mo meilongo lyawo, ya vule okupita niitsa iiwanawa moshitopolwa shaShana.
“Oshigongi shoka okwa li sha ningwa okukundathana ondungethaneko ndjoka tayi vulu okuyambidhidha aalongwa ya kuthe ko oongaku. Aalongwa ashike ye li 897 yomaalongwa ye li 4 083 ya li ye shi pondola moongundu dhopombanda mekonaakono lyahuguninwa omumvo gwa yi,” ta fatulula ngaaka. Ta ti, uuna aalongwa taya mono omayambidhidho okuza kegumbo oshowo koosikola otashi ya kwathele wo natango.
Amukana okwa li natango a kumagidha opolisi yi kale tayi talele po oosikola, okukondolola iingangamithi
oshowo iikolitha hayi kala ya humbatwa kaanasikola. “Oosikola odha pumbwa okutalelwa po, opo aalongwa mboka taya fala iikolitha koosikola ya pewe egeelo
nokutseyithilwa kutya shoka taya ningi osha nika oshiponga nosha puka,”ta ti ngaaka.
Ta ti, mboka owo uupyakadhi wumwe ya ndhindhilike mokati kaalongwa tau nkundipaleke omandhilandhilo
gaalongwa opo kaaya itule mo we meilongo lyawo. “Ohashi yemateke okutala aalongwa taya endaaenda momapandaanda, ya ipyakidhila niinima mbyoka itaayi yambidhidhandha monakuyiwa yawo” ta nyenyeta ngaaka.
Ta gwedha po kutya oshitopolwa shaShana osha tokola kutya otashi kala tashi gandja omandhewo kaalongi oshowo kaakuluntusikola nkene ye na oku eta elunduluko oshowo okuyambindhidha aalongwa ya mone iitsa iiwanawa.
Omulongisikola posikola yimwe mOshakati ngoka edhina lye lyi shiwike kuKundana okwa ti, oya ndhindhilike
kutya aavali oyo oshinima oshinene shi na okudhana onkandangala meyilongo lyaalongwa.
“Aalongwa mboka haye shi pondola niitsa iiwanawa omboka haya mono omayambidhidho okuza kaavali komagumbo.
Omulongwa gumwe oha suukula ashike embo mongulu, ihe ngele okwa shuna kegumbo okwadhimbwa kutya ohayi kosikola,” ta popi ngaaka. Ta ti, yo onga aalongi ohaya kambadhala okuuvithako aalongwa, ihe haaluhe aalongwa haya shuwa ngele ya longwa komuntu gumwe, sho shoka kutya aavali naya kale taya kambadhala okuyambidha aalongwa komagumbo.
– vkaapanda@nepc.com.na