Omukuluntu gwelongo moshitopolwa shaShana Hileni Amukana ota indile aalongwa ayehe yondondo 11, taya ka nyololula ekonakono ya kale ya ilopota koosikola dhawo mEtitano.
Amukana okwa indile ngaaka, momushangwa a pititha, kutya momasiku gaheyali gaJanuali nuumvo aalongwa ayehe naya kale ya thika poosikola dhawo.
“Mboka ye li momihandjo naya kale ya thika momasiku gahamano gaJanuali pokati kotundi 12h00 no16h00, opo ya ka longekidhwe nomakonakono oshowo okupewa ondjalula landulathano yekonakono lyawo,” ta ti ngaaka.
Ta ti, oshitopolwa shaShana oshapewa epitikilo ndyoka, okuza koombelewa oonene dhelongo, ihe inashi za momitse dhawo yawo yene, onkene aanolongwa naye shi gwanithe po.
“Aavali naya laleke aanona nawa okuza momagumbo yo naye shi itaale ko,” ta kumagidha ngaaka.
Amukana okwa kumagidha wo aalongwa ya etelele iilongithomwa yawo ayihe yokunyola ekonono.
Ekonakono otali ka nyololulwa okuza momasiku 10 gaJanuali oshilongo ashihe.
Momukanda ngoka gwali gwa pitithwa oomvo gwayi kuSem Shino, omupopiliko guuministili mboka, okwali tseyitha kutya ekonakono lyaKotoba naNovomba 2021 olyi na okushangululwa muJanuali naFebuluali nuumvo.
Ta ti, omukanda ngoka ogwa popi kutya iilongwa ayihe mbyoka taku fekelwa yi na omakonaakono ga yakwa oyali kalekwa notayi shangululwa nuumvo.
Iipotha itatu yina sha neyako lyekonakono oyali ya patululwa kopolisi – iipotha iyali oyo mOngwediva omanga shimwe osho mOndangwa, osho omukanda gwa popi ngaaka.
“Omakonakono gopolisi ogu ulike kutya oombapila odhindji dhiilongwa ya yooloka yomusindalandu omukulu gondondo 12, osho wo omusindalandu omupe gwondondo 11, otashi vulika ga yakwa,” osho uuministili wa ti ngaaka.
Iilongwa itano yondondo 12 osho wo iilongwa 10 yondondo 11, oya gumwa.
Aafekelwa ye li 10 okwa li ya tulwa miipandeko, ashike ye li yahetatu ngashingeyi oya mangululwa paboloha, omanga aafakelwa pamwe yaali yakwiilongo, natango oye li mokalimosho.
Omolweyako lyomakonakono, uuminsitili welongo owali wa patitha oosikoa adhihe ku yele, omvo gwayi.
Caption: Aalongwa yondondo 11 moshitopolwa shaShana ya ilopote koosikola dhawo mEtitano lyoshiwike shika.
– vkaapanda@nepc.com.na