Victoria Kaapanda

Oshikonga shoku gandja omakonaakono gokaankela shoka sha ningwa koshipangelo shopaumwene shOngwediva Medipark, otashi ulike kutya aalumentu oyendji inaya ya ya yaka konaakonwe.

Omunambelewa omugandji gwomauyelele moshipangelo moka Katarina Elago okwa ti, oya minikile aantu ye vule 300, moka mwa kwatelwa aalumentu 10. Ta ti, oshipangelo osha longekindha omaminikilo gookaankela ndhoka ndatu oshikando oshimugoyi nuumvo.

“Okuza omvo ngoka omaminikilo gookaankela ga tameke, oshipangelo shaMedipark osha minikile aantu ye vulithe 6 000,” ta ti ngaaka. Elago okwa ti, oya longekidha omaminikilo gookaankela, okuuvitha ko oshigwana nkene shi na okukeelela omaupyakadhi haga vulu oku etwa kookaankela.

Naye wo okwa kumagidha oshigwana shi kale aluhe tashi konakonwa ookaankela ku yele, oshoka ompito yokumona epango omanga kuyele opo yi li. Okukonaakonwa omukithi gwokaankela ku yele, ohaku keelele aantu ya se, uuna ya mono epango ku yele.

Ndhoka odha popiwa komundohotola Fatima Suleiman esiku oshipangelo shoMedipark shali tashi minikile owina oshigwana kokaankela  yokomagundji, kiivalelo oshowo kiilyo yaalumentu. “Uuna omuntu a konakonwa kuyele,  oha vulu okumona epango. Okaankela ohayi vulu okupangwa uuna yi li ponkatu yotango nenge ontiyali,” ta fatulula ngaaka.

Ta ti, aantu oyendji kaye na euveko lyagwana lyomukithi go kaankela, onkene oye na okupewa omalongo opo ya kale ye na ontseyo kutya, okukonaakonwa kuyele ohaku keelele oshindji.

Suleiman ta ti, oshigwana osha itaala kutya okaankela ihayi, pangwa, ihe shoka ka shi shi sho shili, okaankela ohayi pangwa uuna ya monikila po.

“Okaankela yokiivalelo  yoomeme, okwa ndhindhilikwa oyo tai dhipaga aakintu unene, yi vulithe okankela yokomagundji,” ta ti ngaaka.

Ndohotola okwa ti, omumvo gwayi okwali ya mono iipotha yi li iyali, ihe oyali ya konaakona ashike aanilonga yomoMedipark, omolwa omukithi gwocorona ngoka gwali ko gwa pimbila.

-vkaapanda@nepc.com.na