Nonando omvula oya tegelelwa okuza moshiwike sha zi ko, sho kwali kwa tengenekwa kutya otayi loko, sigo oompaka omapya oga kukuta.

Shoka osha etele aanafalama eteko lyomukumo, nonando yali ye na okamukumo okashona kutya omvula nayi kaloka.

Simon Shiyagaya gwomomukunda Ongali okwa ti, oya ikwata pomutima, ya tila iimuna yawo yise po. 

“Omalutu giimuna otaga ende taga pu po nale, oshoka kape na omwiindhi. Ishewe oshimaliwa shoku landa omwiindhi kashi po,” ta popi neyeme.

Ta ti, oku wete kutya okuna ndjala nuumvo, nonando omvula petameko lyumvo okwali taku ulike kwafa taku ka kala omuloka. Ta ti kewete ngele aanafaalama otaya ka teye shoka ya kuna.

Shiyagaya okwa ti, kombinga yiilya hwe po, oshoka miigandhi natango omuna ngaa mbyoka tayi vulu okuya hupitha omvula ndjika.

“Oongombe niikombo ngele ya si ota tu keyi adha we peni?” ta pula ngaaka. 

Selma Daniel ogumwe gwomaanafalama mboka taya ti omapya gawo otaga ende taga langata po niilya ya wo otayi si po thilu komutenya.

Danela ta ti, okwa li a pulula epya lye momasiku 16 gaFebuluali.

“Nkene iilya yandje ya piti mo mevi, Malitsa aguhe nguka omvula inayi loka,” ta popi neyeme.

Ta ti, shoka otashi ya tula muupyakadhi wo kupulula natango oshikando oshitiyali, sho oshimaliwa osho ngaa shoka tashi nyangwanyangwa.

Ta gwedhapo ta ti, natango ethimbo olya pwapo.

“Onda teka nale omukumo. Otandi tegelele ngaa pamwe omvula tayi keya yo yi yumudhe po iilya yandje,” ta ti ngaaka.

Saara Timoteus gwomokunda Etilyasa okwa ti aanamukunda aakwawo nayo, otaya li li iilya yawo ya sa po ko mutenya.

“Omvula oya ningi ethimbo inaayi loka momikunda ndhimwe dhokombinga huka, onkene oyendji oya kanitha iilya yawo sho ya si po ko mutenya. Otashi yematake,” ta popi ngaaka.

Ta ti, shoka okwa li sha shololitha aanafalama yamwe mboka kaaya pulule omapya gawo omanga kwa li yena elalakano lyokupulula kehulilo lyaFebuluali.

Sirka Malakia gwomokunda Onanyalala okwa ti, okwa hepitha iimaliwa, ombuto oshowo ethimbo lye, ihe ina likola mo sha. “Iilya yandje oya sa po thiluthilu, kandi na nkene ndina okuninga, otandi tegelele ashike okukwata openzela opo ndi pululithe epya lyandje oshoka otandi ka sa ondjala,” ta po pi ngaaka. – vkaapanda@nepc.com.na