New Era Newspaper

New Era Epaper
Icon Collap
...
Home / Aanamibia nayo otaya ka pewa oompito dhomayindilo giikunino yiikwamboga

Aanamibia nayo otaya ka pewa oompito dhomayindilo giikunino yiikwamboga

2022-04-04  Victoria Kaapanda

Aanamibia nayo otaya ka pewa oompito dhomayindilo giikunino yiikwamboga

Uuministeli gwuunamapya owa yamukula kutya, aaNamibia ayehe otaya ka pewa ompito yoku ninga omayindilo giikunino yiikwamboga tango muJuni/Juli nuumvo.

Omunambelewa omukuluntu go mauyelele muuministeli wuunamapya Chrispin Matongela, okwa ti, aanafalama ayehe ye na ehalo, otaya ka pewa ompito yokuninga omayindilo giikunino.

Matongela ndhoka okwa li edhi popi sha landula ehangano opo lya twotwa lyaanangeshefa yomonooli Naloba, sho kwa li lya indile epangelo lyi kaleke edhiladhilo lyokugandja oompito ndhoka kaakwilongo.

“Kapena nando omuNamibia gumwe taka indikwa nenge taka hupako okuninga omayindilo ngoka,” ta popi ngaaka.

Ta ti, osha ikolela kehangano nenge komunangeshefa ngoka taka ninga omayindilo ngele otaka gwanitha po shoka tashi pulwa kuuministeli womidhingoloko opo gumwe a vule okumona ompito ndyoka.

“Uuministeli otau katala kethaneko lyongesha, ndyoka ta li ka ulike nokukwashilipaleka uuministeli wuunamapya kutya ngoka ta ningi eyindilo ota vulu shili,” ta fatulula ngaaka.

Ta ti, itayaka gandja ompito ndyoka ku kehe ngoka, nonando iinagwanitha po shoka sha pumbiwa kuuministeli, ashike oompito dhomayindilo otadhi ka gandjwa ku kehe ngoka ena ehalo.

“Ta ti, nonando minista guunamapya Calle Shcletwein a li a popi ngaaka koDubai expo, natango oku li metifa okuninga iigongi okufatulila aaNamibia kombinga yomayindilo ngoka.

“Oshigwana otashi kapewa ompito okugandja omadhiladhilo gawo oshowo okupula nokupewa omayamukulo kombinga yiikunino,” ta popi ngaaka.

Matongela okwa ti, ooproyeka ndhoka oonene no hadhi pula oshindji, okutameka kiilongitho yomashina oshowo etameke po lyoshikunino, onkene odhina okugandjwa kwaamboka tayeke shipondola.

Naloba oshiwike sha ziko okwa li atsu onyala mevi kutya, epangelo ita li vulu okugandja oompito dho mayindilo giikunino kaakwilongo, omanga pena aanangeshefa moshilongo yena ehalo lyokuninga iikunino.

“Aakwilongo naya ninge oongeshefa ndhoka itaadhi vulu okuningwa kaaNamibia, opo aaNamibia yakale taya teke kuyo, ihe itaya kala taya ningi oongeshefa tadhi vulu okuningwa kaaNamibia,”Naloba ta ti ngaaka.

- vkaapanda@nepc.com.na


2022-04-04  Victoria Kaapanda

Share on social media