Aanegumbo ye li 38 ya kwatela mo oyana, aatekulu naatekulululwa yanakusa Johannes Sebron Kanyanda, ngoka a li omukalimo gwomomukunda Onampadhi moshitopolwa shaShikoto anuwa ohaya lala inaaya kotha sho ya kuthwa epya kumwene gwomukunda.

Mongashiingeyi epya ndyoka lyoshikokola olya longwa, lyi na iilya, ashike mwene gwomukunda anuwa okwa ti okwa tegelela owala ya teye mo iilya yawo ye a vule e li kuthe ko.

Shika mwene gwomukunda okwe shi koleke ta ti aanegumbo mboka oya li ya ningi omimvo odhindji inaaya longa mo mepya moka, ihe oya tameke ishewe oku li longa omimvo ntano dha piti. 

Omonakandhona gwanakusa Kanyanda, Petrina Tutumina Johannes ngoka a popi peha lyaamwayina okwa ti, kayu uvite ombili kwaashoka sha tokolwa kelelo lyOndonga kutya epya lyawo ota i kuthwa ko kelelo omanga ye na omwenyo.

“Epya lyetu olya kala hali longwa nale omanga aakuluntu yetu inaaya sa, notwa tsikile okulonga sho ya hulu ko sigo onena, nonando haalihe lya pwa ko. Ngele otwa kuthwa epya lyetu otatu ka lya peni, aanona yetu otaya ka lya peni monakuyiwa?” ta popi neyeme.

Petrina ta hokolola kutya, konima yeso lyahe, egumbo okwa li lya pewa kamwe komaanona yaamwayina ashike oka hulitha mo2017.

“Okwa kala e tu edhilila atuhe megumbo moka, nonando payithano egumbo olye,” ta ti ngaaka.

Ta ti, oshoka okwa li a hokana, omukiintu gwe okwa li a popi kutya ye ita vulu okukala negumbo lyomiti, ihe ote li gandja miikaha yaakwanezimo.

“Aakwanezimo ayehe okwa li ya tsu kumwe ee taya tokola okugandja egumbo komumwameme gwomukuluntu Loide Kanyanda ngoka oye a kala megumbo nokulonga epya omimvo adhihe dha piti,” ta popi ngaaka.

Ta ti, omatokolo agehe ngoka okwa li ga ningwa komeho gamwene gwomukunda gwAmupadhi, Thomas Gebhard Ndadala, ihe kakwa li a tya ko sha.

“Otu li ompinge netokolo ndika, oshoka out uvite kutya mepya lyetu moka anuwa otamu tungwa okapangelo, osasiona yopolisi oshowo osikola yoshikunino, ihe shoka kakwa li sha kundathanwa nando onomukwanezimo gwetu gumwe,” ta hokolola ngaaka.

Johannes okwa ti, sigo onena Ndadala okwa tindi okugandja ombapila yuumwene wevi lyepya.

“Tse aakwanezimo otu uvite uudhigu, mumwameme ngoka e li megumbo, te tu tekula naanona yetu oku na uunkundi womeho, omuposi, otaya ka lya peni sho ta kuthwa epya,” ta pula ngaaka.

Johannes Etitatu okwa shangele omukwaniilwa Fillemon Shuumbwa Nangolo ta indile omukwanilwa a talulule etokolo ndyoka, nomutumba gu shunune mo oshoka oyu uvite ya yugwa uuthiga gawo.

“Omatompelo ngoka ga kuthitha ko epya lyetu, otaga kumitha, pe na ngono kutya tate okwa li ehole aakiintu naashoka kutya oyana yaamati ayehe oya hula ko. Shoka oshi na shike nepya tali kuthwa ko kelelo?” ta pula ngaaka.

Ta ti, oshike epya ndyoka lyi na okukuthwa ko paife inaali kuthwa ko omanga he e na omwenyo?

Mwene gomukunda Onampadhi, Ndadala, okwa ti epya olya kuthwa ko sha landula oompango nomalandulathano gwopamuthigululwakalo kutya, ngele epya olya ningi omimvo dha pita pundatu inaali longwa oha li kuthwa ko kelelo.

“Epya ndyoka tali ithanwa eputu, olya ningi omimvo dha pita 20 inaali longwa, ihe olya tamekwa okulongwa ashike omimvo ngiika ntano dha piti,” ta popi ngaaka.

Ta ti, eputu ihali lalwa, ihe ohali uhalwa ashike, sho osho shoka kwa li anuwa a ningi omatokolo kutya omanga epya ihaali longithwa, na li kale tali yambidhidha aanamukunda niinyangadhwalwa yilwe.

“Ngame hangame nda tokola kutya epya ndyoka nali shune miikaha yelelo, ihe onda landula ashike oompango dhelelo lyopamuthigululwakalo,” ta popi ngaaka.

Ndadala ta gwedha po kutya mboka taya kondjele epya ndyoka kaye na uuthemba oshoka epya ndyoka okwa li lya gandjwa komutekulu gomusamane ngoka a hula ko nale, onkene oyana nenge omukulukadhi oyo ye na uuthemba.

“Omukulukadhi gwanakusa, okwa li a tindi egumbo nepya ndyoka. Okwa li e li gandja miikaha yandje, onga mwene gwomukunda, sho nda li nda tokola okuya po nedhiladhilo kutya epya ndyoka nali kale ta li longithwa iinyangadhalwa yomomukunda,” ta hokolola ngaaka.

Ta ti, ye ina kondjela epya, ihe ota kondjele oshigwana she.

Ndika ehokololo etiyali tali kumitha, lyoothigwa tadhi kuthwa epya mOndonga, lya holoka meni lyethimbo efupi. 

Momumvo 2020, aana yaShikongo Nikodemus Kambangula ye li 14 yomomukunda Emono mOnayena natango moshitopolwa shaShikoto oya li ya kuthwa oshitopolwa shepya lyawo kelelo lyOndonga. Oshipambu shoka anuwa osha li sha gandjwa po komukulukadhi omumwayina gwahe, ngoka e ya okukondjela epya konima yomimvo 21 okuza sho mumwayina (Kambangula) a hulitha.

- vkaapanda@nepc.com.na