Victoria Kaapanda
Ngoloneya gwoshitopolwa shaMusati Erginus Endjala okwati, onkalo yaAngola ya gwongala pEtunda natango inayi tya po hwepo, nomwaalu oguuka komeho, noomeme taya mono uunona oshowo natango mboka taya zi koAngola.
“Sigo ompaka Aangola yeli 2 458 oya gwongala pEtunda, yeli 117 yo muyo oyena oohanona omanga yeli 86 yeli momategelelo. Uunona owa yalulwa wuli 1 058,” ta ti ngaaka.Ta ti, oomeme yamwe oku wete kutya oyeya nomategelelo omanga yamwe ye ga ningi omanga yeli moNamibia.
Endjala okwati, Aangola mboka okwali ya ponokele moNamibia muFebuluali nuumvo, sho yeya okukonga uuhupilo omolwa ondjala anuwa yili koshilongo shawo. “Aangola mboka oya taalela uupyakadhi wuuyogoki oshoka ka yena omeya ga yela, uundjugo oshowo omalukalo. Ashike otatu pandula lela oshoka sigo onena inatu lopotelwa oshipotha dhoCovid-19 okuza kEtunda,” ta popi ngaaka.
Ngoloneya okwa ti, epangolo lyAngola okwali lya uvaneke okwiilako aantu mboka muMei, ihe sigo ompaka inali shi ninga. “Omakwatho okuza moshigwana otaga ende taga shongola, nonando pena ngaa mboka taye shi ningi,” ta popi ngaaka.
Ta indile moshigwana ta ti, kehe ngoka ena shoka ta vulu okuyambidhidha nasho, neshi ningi owala, oshoka aantu mboka oya taalela onkalo odhigu.
“Ohaku ti, kwathela mukweni eli muudhigu, ku shi shoka shili komeho goye,” ta ti ngaaka.
Maria Jao ngoka naye eli pEtunda okwati, kena nando ohokwe nedhiladhilo lyokushuna koshilongo shawo, oshoka anuwa okuna ondjala.
“Koshilongo shetu ka kuna aantu yena ohenda nando, oto si ondjala kaa pena ngu teku yambidhidha, nepangelo lyetu iha li tu shi ningile,” ta po pi ngaaka.
Ta ti, moNamibia omuna aasinamutimahenda mboka haya gandja okashona yena, nonando kashi shi oshindji, oshi vulithe owala.
“Shoka shetu eta koNamibia ondjala, ka shi shi kutya otwa hala okufadhuka po oshilongo shetu, ihe ngele uupyakakdhi mboka itawu patukununwa, nena na se itatu shuna,” ta popi ye ta tanguna ngaaka.
Jao okwati, ko maluvalo oya gwedhako onkene otashi ka kala oshidhigu okugwanitha po oombumbwe dha kehe esiku, ngele oya shuna kaa puna shoka sha kandulwa po.
“MoNamibia omu na omakwatho omahwepo, shi vulithe koshilongo shetu. Epangelo lyetu otali li tu ithana tu shune, ihe kali na ko nasha natse,” gumwe popi ngaaka.
Ta gwedha po ta ti ngeno okwa li ina ye ya okukonga uuhupilo moNamibia ngeno oyendji oya sa nale kondjala.
“Sho u wete aantu mboka kwali twa thiga ko magumbo ye ya huka tu li, ooshoka natango ya taalela uupyakadhi wa faathana. Ngeno okwa li ya kwathelwa ngeno inaya za ko,” ta popi ngaaka.
Ta ti, nonando onkalo ye li muyo hayo ya hala, oyi vule ndjoka yi li koshilongo shawo.