Minista mendiki lyuukashikekookantu, ekandulepo lyoluhepo nonkalonawa Doreen Sioka okwa ti, okuza omumvo 2019 sigo onuumvo, aanona ya ningilwa omiyonena nomahepeko oshilongo ashihe oye li 4 329.
Sioka ndhoka okwe dhi popi poshigongi shotango sha li sha ningwa kombinga yokatendo koompango taka tulwa miilonga kokusila oshimpwiyu nokugamena aanona, “ The Child Care and Protection Act no.3 of 2015”.
“Okatendo haka okwa li ka tothwa mo mo2015, sho ka kapinge na po “the child act no 33 of 1960”, noka li ka tulwa miilonga okuza mo 30 January 2019,” ta popi ngaaka.
Ta ti, okatendo hoka oka lundululwa noke li kompito yahuginina lela ka ye metifa, okusila aanona oshimpwiyu oshowo okuya ga menako mahepeko nomiyonena taya vulu okutaalela.
“Onkatu ndjoka oya li ye eta omalunduluko moku gamena aanona, sho aahungimwenyo ya li ya indjipalekwa miitopolwa okugandja omakwatho gwomakumagidho, okupitila muuministeli wetu” ta ti ngaaka.
Sioka okwa ti, okuza pehulilo lyomumvo gwa yi, aahungimwenyo oya lumbu niipotha yaanona ye li 293 ya ekelwahi kooyina, aanona yii tekwa kaakuluntu yawo ye li 1 587, aanona ya taalela omahepeko gwomomagumbo ye li 883 oshowo aanona ya kwatwa koonkondo ye li 1 566.
“Nonando uuministeli wa kambadhala okuandjaneka aahungimwenyo moshilongo natango ope na ompumbwe onene yaahungimwenyo okulwitha noku shonopaleka iipotha yoludhi ndoka,” ta popi ngaaka.
Ta ti, Namibia ngaashingeyi oku na omuhungimwenyo gumwe gwaanona ye li 13 000, ihe ina gwana. Ta tengeneke ta ti, ngeno kehe oshikandjohogololo oshina okukala shina omuhungimwenyo.
“Shoka inatu vula oku shi gwanitha po. Out na aahungimwenyo taya kwathele iikandjohogololo iyali nenge itatu moshitopolwa,” ta fatulula ngaaka.
Ta yelitha ta ti, omuhungimwenyo ota vulu okushonopalitha iipotha yomahepeko gaanona, ihe ita vulu okuya muule woshipotha.
Sioka okwa ti, oya ndhindhilike kutya omawi gaanona okupopya omaudhigu gawo, inaga yalulwa, onkene okatendo haka okeya pa uuthemba okupititha omaupyakadhi gawo. Minista okwa totha mo natango uupyakadhi womategelelo inaaga longekidhwa mokati kaanona. “Ope na aanona oyendji ya valwa ya pitila momategelelo inaaga longekidhwa, ihe shoka nasho osha pumbwa okutulwa miilonga,” ta popi ngaaka.
– vkaapanda@nepc.com.na