Omupithithi gwomauyelele kombelewa yokunongonona noku tala onkalo yombepo moshilongo Odilo Kgobetsi okwa ti aakalimo yomonooli yoshilongo naya kale ya ilongekidha, oshoka ope na ompito onene efundja lyi thike miitopolwa moka.
Itopolwa yokonooli, nosho wo uumbuganti waAngola owa lokwa omvula onene mehuliloshiwike lyazi ko.
“Mehuulilo shiwike omvula oya loko nawa miitopolwa oyindji yokonooli, ihe natango omvula otayi tsikile okuloka,” ta popi ngaaka.
Kgobetsi ta ti, sho omvula ya loko miitopolwa moka iishana oyuudha omeya.
Ta ti, omvula ndyoka onene tayi tengenekwa okuloka, otashi vulika yika loke sigo ehulilo lyoshiwike tu uka.
“Oshitopolwa shaMusati osha lopotwa sha mono omuloka omunene, nosha dhidhilikwa sha mona omata goomilimita dha pita po50,” ta ti ngaaka.
Kgobetsi okwa ti, oya lopotelwa kutya ope na omahala gamwe ge li kohi yomeya, konima molwa omuloka gwehuulilo shiwike.
“Otandi tseyithile aakalimo ayehe monooli opo ya kale yiilongekidha, opo efundja kaali ya adhe ombaandhilila,” ta kumagidha ngaaka.
Nonando omvula ya loko unene, oya eta omukumo maanafalama yomomapya mboka ya li ya sholola kutya, itaya ka likola mo sha we momapya gawo.
Oshitopolwa shaMusati kasha li sha lokwa nawa petameko lyomuloka, onkene iilya yimwe okwa li tayi ende tayi kukuta omanga yimwe ya sa po thiluthilu.
Maria Shilongo omukalimo moshitopolwa shaMusati okwa ti oya mono omuloka omwaanawa omasiku ga zi ko, ihe iilya ashike yokombinga yimwe ta tengeneke tayi ka yumuka.
“Omvula oya kala ka, onkene otatu ka tala ngaa iilya mbyoka tayi ka yumuka mokati kiikwawo,” ta popi ngaaka.
Shilongo ta gwedha po kutya oya pandula natango komvula oshoka oya eta omeya moshitopolwa moka mwali muna enota lyiimuna.
“Iimuna yetu oya ningi esiku tayi si enota, no twa kala hatu ende oondjila oonde ta tuka nwetha,” ta popi ngaaka.
- vkaapanda@nepc.com.na