New Era Newspaper

New Era Epaper
Icon Collap
...
Home / Aantu ye li 41 ya si muule womasiku gatatu

Aantu ye li 41 ya si muule womasiku gatatu

2021-06-04  Victoria Kaapanda

Aantu ye li 41 ya si muule womasiku gatatu

Minista guundjolowele nonkalonawa Kalumbi Shangula okwa ti, aantu ayehe ya hulitha oshiwike shika oyendji inaya tuntilwa omanga yamwe kape na natango uuyelele ngele oya li ya tuntilwa.

“Okutuntilwa otaku keelele omawupyakadhi gatya ngaaka. Namibia oku na omwaalu gwaantu aashona nokusa,” ta ti ngaaka. Aantu 41 oya si okuza Omaandaha sigo Etitatu oshiwike shika, pethimbo oshifo shika sha yi komanyanyangidho omwaalu gwEtine oshowo nena inatu gu mona natango.

“Otandi tsikile okukumagidha oshigwana shi itule mo mokutaamba omiti dhokukeelela omukithi ngoka. Shoka osho ashike tashi vulu okukaleka po oomwenyo dhetu,” Shangula ta ti ngaaka. 

Ta ti, omiti ndhoka otadhi gandjwa oshali shaMuhongi, onkene kehe gumwe oku na uuthemba okupewa omiti ndhoka pomahala guuhaku oshilongo ashihe.

Aalongwa ye li 27 oya kwatwa komukithi gwoCovid-19. Aalongi ye li omulongo oshowo aaniilonga mendiki lyuuministeli wuundjolowele ye li 26 nayo oya kwatwa koCovid-19.

“Nonando omwaalu gwaantu taya aluka ogu shi ngaa okupandulwa, aantu ya kolekwa ye na omukithi gwocorona oshilongo ashihe oye li 4 380,” Shangula ta ti ngaaka. Ta popi ta ti, aantu ye li 286 oye li miipangelo naantu ye li 53 yomuyo oye li kiifudhitho.

Omwaalu ngoka ohagu ende tagu lunduluka esiku kehe oshoka kehe mesiku otamu kwatwa nenge tamu aluka aantu nenge taya hulitha, ngaashi naanaa tagu ende gu uka pombanda” ta ti ngaaka.

“Aantu ye li yatano oya si koondoolopa yaVenduka, yatatu kOkahandja, yaali kOshakati nagumwe kOtjiwarongo, mboka ya tula omwaalu gwaantu ya huliha kocorona gu thike po865 ,” ta ti ngaaka.

Minista natango okwa popi ta ti, okuza esiku lyotango omukithi ngoka sho gwa ponokele moNamibia, aantu ya konaakonwa, taya fekelwa omukithi gwoCovid-19 oye li 56 264 ayehe kumwe.

Ta ti, aantu ye li 50 532 oya li ya ikalekelwa omanga ye li 48 641 ya li ya aluka. Shangula okwa ti, ngashiingeyi aantu ye na omukithi gwocorona oye li 1 891 moNamibia.

“Otandi kumagidha oshigwana shi tsikile okugwanitha po nokulongitha iikeelelitho, okushonopeka oshowo okukeelela omukithi gwoCovid-19,” ta kumagidha. Shangula okwa ti, omukithi omo gu li mokati koshigwana, onkene oshigwana nashi simaneke okuzala uumasika momahala gwomangundumano oshowo okugwanitha po oompango dhomwaalu gomangundumano.


2021-06-04  Victoria Kaapanda

Share on social media