Ngoloneya gwoshitoplwa shaShana Elia Irimari okwa gandja omagano pambelewa guutemba u li 22 miikandjohogololo 11 oshiwike sha zi ko.

“Kehe oshikandjohogololo osha mono uutemba wu li uwali tau ka gandjwa kaanuulema ye li lela mompumbwe,” ta ti ngaaka.

Oombelwa dhaNgoloneya okwa li dha pewa uutemba kehangano hali kwathele aanuulema moshilongo ashihe lyoRani Traders opo lyi vule okugandja kwaamboka ye li lela mompumbwe miikandjohogololo mbyoka.

Ngoloneya okwa pandula ehangano lyoRani Traders ndyoka sho lya dhimbulukwa oshitopolwa she.

“Shika otashi ka kwathela poompito odhindji aantu mbaka ye li mompumbwe, noshe ya pe natango omukumo kutya oye niwe nayo koshigwana,” ta popi ngaaka.

Ta ti, okwa li ya totha mo ashike aantu mboka ye li lela mompumwe, oshoka uutemba nawo okwa li ashike wa gwana mboka ya li ya pewa esiku ndyoka

Aantu mboka ya pewa uutemba oshiwike sha zi ko okwa li ya holola enyanyu noya pandula eyambidhidho ndyoka oshoka oya yambidhidhwa naashoka sha simana unene kuyo.

Taya ti, uutemba owe ya kwatha noonkondo notaya kala taya inyenge nawa yo taya ka gwanitha po iilonga yawo yesiku kehe nuupu.

“Okatemba ohaka kwathele oku inyenga oshowo okuya pomahala gi ili nogi ili mpoka kakwa li taya vulu okuthika omolwuunkundi ye na,” taya popi ngaaka.

Ta ya ti, oya pendula ehangano ndyoka oshowo oombelewa dhangoloneya sho ya ningi aanelago ya tothwa mo mokati kayakwawo ee taya  yambidhidhwa ngaaka.

“Mboka ya taalela onkalo ya fa yetu ihe inaya mona omayambindhindho pethimbo ndika, inaya ninga oomwenyo oombwiinayi, oshoka nayo esiku lyawo otali ya owala, omakwatho inaga huulila mutes,” ta ya popi ngaaka.

– vkaapanda@nepc.com.na