Mehuliloshiwike aapolisi 29 mOshana oya li ya shuna komagumbo ya nyanyukwa sho ya li ya yelwaayelwa okumona oompito dha yooloka.
Aapolisi yamwe okwa li ya mono oompito dhuuinspekta, uuwarrant oshowo uusergeant class 1 oshowo 2.
Omukuluntu gwopolosi moshitopolwa shaShana Naftal Lungameni Sakaria okwa ti nonando ina vula okuyelayela aaposi ayehe, okwe shi ningile mboka ya kala nokulonga nuudhiginini.
“Shanakulya oshanakulonga, kehe ngoka ta ka longa nuudhiginini neyitulemo oku na okumona ondjambi, ngaashi tatu gandja oshiholelwa mpaka,” ta ti ngaaka.
Sakaria okwa li a yelaayela aapolisi mboka sho kwa li a ningi oshigongi Etitano kOshiko mOngwediva ta kumagidha nkene aapolisi ye na okulwitha iimbuluma pethimbo lyomatango omanene.
Ta ti oshitopolwa she otashi kala sha tala moondjila aahingi mboka taya hingi iihauto ye li kohi yodhungo.
Okwati aapolisi otayaka kwashilipaleka kutya omuhingi kehe ota hingi e li nawa ke na nande iikolitha sho ya tula po oomboloka dhi li pomahala ga yooloka moopate moshitopolwa ashihe.
“Otu na aapolisi ye li miikonga taya longitha omikalo dhokulwitha iimbuluma onkene nonade aapolisi hayo awike ya pumbwa okulwitha iimbuluma mbyoka nena oshigwana wo osha pumbwa okuyambidhidha opolisi opo ya adhe esindano mwaashoka yo woo oshitopolwa shi kale kasha na iimbuluma,” osho Sakaria ta hokolola ngaaka.
Okwa hokololwa kutya opolisi otayi longitha omukalo gwokufudhilamo ndele tashi ka kwashilipalekwa koshipangelo hoka omuntu ta ka kuthwa ombinzi ndjoka tayi konaakonwa kutya oyi na shili iikolitha nenge kayi na.
“Ngele shoka sha kwashilipalekwa nena opo nduno mbaka taya vulu okumangwa po yo ya wape okupewa eegeelo lyopokathimbo ndyoka taya ifutile mo ethimbo ndyoka nenge taya yi mokakuma,” ta ti ngaaka.
Okwa li woo a londodha aakwashigwana kutya inaya thiga omagumbo gawo kage li metonatelo ngele otaya yi koondolopa dhilwe oshoka ookalyamupombo otaya vulu okulongitha ompito ndjoka okuteya omagumbo gawo.
vkaapanda@nepc.com