New Era Newspaper

New Era Epaper
Icon Collap
...
Home / Aashakati ya opaleke ondoolopa

Aashakati ya opaleke ondoolopa

2021-11-01  Victoria Kaapanda

Aashakati ya opaleke ondoolopa

Victoria Kaapanda

Elelelo lyondoolopa yaShakati mEtitano olyali lya kutha onkatu opo li opaleke ondoolopa ayihe koonono. Pethimbo lyoshiindingili shika Ngoloneya gwoshitopolwa shaShana Elia Irimari, okwa li a kunkilile omuthindo kutya ekako ohali etele aantu olungwenye.

Eopaleko ndyoka hali ningwa omvo kehe, olya li lya longekidhwa kohi yoshipalonyolo “Oshakati nashi zize, sho nashi kalekwe sha yela”.

“Uuyogoki owa simana onkene oshigwana oshi na okukala tashi opaleke omalukalwa gasho oshowo omidhingoloko dhasho opo kuyandwe omikithi tadhi vulu okupitila moongaga,” ta popi ngaaka. Ta kumagidha oshigwana shaShakati kutya, nashi kale sha tula uuyogoki komeho.

“Ondi inekela kutya kehe gumwe okwa hala ondoloopa ndjika yi hume komeho, pamukalo gwomayakulo gayooloka, ihe shoka otashi ningwa ashike uuna ondoolopa ya yela, oshoka kape na ngoka ta hala, oku eta ehumo komeho mehala lya gagala,” ta ti ngaaka.

Irimari okwa ti, esiku ndyoka inali kala olyo tali opalekitha aakwashigwana, ihe nashi kale onkalondjigilile noshi holelwa sho ku opaleka. Ta gwedhe po ta ti, okwa nyanyukilwa aakalimo yomOshakati sho ya kutha ombinga oku opaleka ondoolopa yawo.

“Ngaashi naana, sha tumbulwa moshipalanyolo sho nuumvo kutya, ondoolopa yaShakati nayi zize, otandi kumagidha aakwashigwana ya itule mo moku kuna omiti,” ta kumagidha ngaaka.

Ta ti omiti ohadhi dhana onkandangala mo mikalo ndha yooloka, nodha simana wo monkalamwenyo yo  muntu kehe.

“Omiti ohadhi opaleke oondoolopa, ohandhi gandja ombepo  nohadhi koleke uundjolowele womuntu,” ta ti ngaaka.

Ngoloneya okwa kumagidha oshigwana ta ti, nashi kale oshinakugwanithwa shakehe gumwe okutsika omiti.

Mayola gwelelo lyondoolopa yaShakati Leonard Hango okwa ti, uuyogoki otawu kala po ashike uuna, kehe gumwe tewu simaneke noku wu tula miilonga.

“Ondoolopa otayi kala ombwaanawa uuna ya yela,onkene otandi, tsikile okukumagidha oshigwana shaShakati shi kaleke po uuyogoki,” ta popi ngaaka.

Hango ta ti, kehe gumwe na kaleke ehala lye lya yela, opo shi kale oshi holelwa sha kehe gumwe.

Ehumo komeho lyondoolopa ohali holoka una pe na uuyogoki.

vkaapanda@nepc.com.na


2021-11-01  Victoria Kaapanda

Share on social media