New Era Newspaper

New Era Epaper
Icon Collap
...
Home / Aatekuli naya hulithe po okatongotongo momagumbo

Aatekuli naya hulithe po okatongotongo momagumbo

2021-01-25  Victoria Kaapanda

Aatekuli naya hulithe po okatongotongo momagumbo

Omulumentu gwomimvo dhopokati Mbundje Simon  Lazarus a yambukile momukunda Okaku  Komagolo moshikandjohogololo Etayi okwa ti, aakuluntu naya tekule aanona ayehe  ye li momamugumbo shi thike pamwe.

“Onda ndhindhilike kutya aakuluntu yetu oyo haye tu yonene oonkalomwenyo dhetu monakuyiwa, tu kale inaatu pondola sha omolwa uuteku twa mono wa yoolokathana momagumbo,” Lazarus a popi ngaaka.
Ta ti, aakuluntu taya tekula uunona kaawu shi wawo, unene oomeme ohaya tongola pokati kuunona wawo, nuunona tawu tekulwa momagumbo gawo.

Lazarus ta kumagidha ta ti , onkalo ndjoka ohayi lemaneke aanona mboka taya gwanithilwapo omawunawa agehe pethimbo ndyoka, ihe monakuyiwa ohaya ka ninga kakombo ilitha, kanzi igalula.

“Otandi popi oshinima tashi shiningwa moshigwana nosha holoka olwindji. Aakulumntu nenge aatekuli naya kale ya tala kehe gumwe e li megumbo  ngaashi ya tala oyana ye ya vala. Naya hulithe po okatongotongo,” Lazarus ta ti ngaaka.
Ta ti, ethimbo limwe aanona mboka taya tekulilwa onyanya ohaya yonenwa oonkalamwenyo dhawo natango kaatekuli oshoka ohashi nkundipaleke omadhiladhilo gaanona, ihe kosikola itaya pondola ko  we sha.

Lazarus natango okwa ndhindhilike kutya aanona mboka ya tekulilwa okuya kosikola kaayena sha  shokulya, oyo haya ka kala noonkalamwenyo oohwepo kwaamboka ya tekulwa nawa.
“Kalunga ka dhipagelwa oyana, aanona mboka ohaya kaninga aanashilonga monakuyiwa, onkene aakuluntu naya hulithe po okulemaneka po aanona yawo yene,” Lazarus a popi ngaaka.

Okwa gwedha po ta ti, aanona ayehe manga ye li megumbo limwe , ayehe naya mone ohole ya faathana yo naya talike ko shi thike pamwe.
Loide Shipanga ngoka a hokolola okahokololo ke pawufupi okwa ti, ehokololo tali popiwa kuLazarus, oyo ondjila eenda.
“Onda tekulwa kumeme, ano omukulukadhi gwatate ngoka a tekulandje okuza poomvula ndatu, sho kwa li meme a li a mana oondjenda,” Shipanga ta hokolola.

Ta ti, ondjila okwa li ondhigu noya mbwalangandja, kakwa li oshipu, ihe Pamba okwa kwatha.
“Onda kokele pamwe nokamwameme kandje, makula gwandje ngoka ngaashi ngeyi nakusa. Osha pulandje oomvula odhindji opo ndi dhimbulile kutya, ka ndili na meme avala ndje nonando kapena ngoka a li a yakelendje ko,” Shipanga ta ti ngaaka.
Ta ti, monkalo moka kwa li a li okwa li yi nyanyaleka, nosha kala tashi kwelengendja, nokwiipula  kutya ano omukulukadhi ngoka oye ngaa meme  gwe shili?

Shipanga ta ti, nonando okwa li yethike pamwe nomumwayina ngoka, anuwa ita dhimbulukwa nando esiku limwe, mumwayina ta teleke , takateka omeya nenge takalonga mepya, oshoka anuwa otakalesha.
“Ote pandula okwa li nda valwa nomagano, okwa li handi ende andilesha nda uka kosikola oshoka olyo ashike ethimbo handi mono. Onda li nda mana osikola yandje sigo ndayi koshiputudhilo shaUnam kOvenduka hoka kwa li ndaka tsikila eyilongo lyandje,” Shipanga a 
hokolola.

Ta ti, onkalamwenyo ya tanauka, meme gwe  ngoka athigipo uuyuni, okamwayina   ke hoka oka li kathanga osikola omuthi, sigo onkalamwenyo ya ningi ombwiinayi, ngaashingeyi nako kathigipo uuyuni. 
 


 


2021-01-25  Victoria Kaapanda

Share on social media