ǀAeǁgams !Ā!khōmais ge surudeba mātare tama hâ ǂnûiǂgādi tsî ǁanǂgāsaben hîa ǀhaob ai miljundi !nâ hâ marina ǁîn ǁgam-i tsî !nanǀgaib ai suruden ǀkha ǀhuru tama hâ. 

Nē kai surudeb, !gōsase ǁgam-i tsî !nanǀgaiba !khōǂgā hâb ge !kharu ge 60 disi tsēdi ǀguide !khōǂgā hâ. 

ǂHanub berodi hoaragadi ge ǀhaob ai !ā!khōmaisa N$80 miljunsa surude hâ tsî N$20 miljuns ge aitsama mâbasen ǂnûiǂgāde xu hâ,” tib ge ǀAeǁgams !ā!khōmais mîgowaba-aob, Harold Akwenyeba ge mî.

Nēsis kōses ge !ā!khōmaisa koro ministeridi hîa ǀhaob ai N$47 miljuns surudeba ūhâdi di !nanǀgaiga ge ǁara. 

Akwenyeb ge ge mî, !âubasenhe geresa !oan noxopa ǀnî ministeridi !nanǀgaiga nî ǁarasa, mātaredi nî ǂgâxa tama is karao. 

ǁNā koro ministeridi hîa !nanǀgaiba ge ǁara-aihedi ge: !hūde ǁkhawa kō!gâs, !norasasib tsî ǁawosasib, maindi tsî ǀgaib, ǂkhamkhoen tsî ǂgamǂgamsens tsî ǁkhaubasens tsîna. 

“Sida ge ǂhanub berodi ǀguide ǁnāǂam tama hâ, hoan ǀkha da ge a ǁaxa hîa surudeb ǀkha khaohâ hâna nēsin ga a ǂhanub dis, aitsama mâbasen ǂnûiǂgās tamas ka io ǀguiǀguibe khoes hoasa. ǁNā-amagan khoena !oabadi hîan ra !khō!oade mātare tsî ǂanapega ǁkhoaxa tama mâsiga tā aitsama !aroma,” tib ge ge mî.

!Ā!khōmais mîgowaba-aob ge mîs ge, ǁîn nēsi ǀgui ǁaradi ǀkha go tsoatsoasa Covid-19 mâsib xa ge !aromahese. 

ǁKhātib ge ge mî, ǁgam-i ǁaradi nî saosa nē ǁōs nî !kharus karao.

“ǁAnǂgāsabena ta ge ra ǂanǂan ǂgao in mātarede ǁaeb ai dī, ǁkhawa ǀhui-ambahes !nanǀgaib dis 48 irgu ǁaeb !nâ ǀgui nî dīhe ǁkhā amaga,” tib ge ge mî.

Akwenyeb ge !gāsasiba mātares ǁaeb xa mā tsî ge mî, 15 mâ ǁkhâb dis hoas a ǀuniga tsē ǁnā ǁkhâb ǁgam-e mātares !aromasa tsî ǁnā datoms khao!gâ mātaresa !onkhao hâsa. 

Hanas 15sa sâǁaeb !nâ nî ǁnās kara, os ge sao ra sîsentsēsa ǀuni tsēs mātares dis ase nî ūhe.