Omukulupe gwomimvo 66 Giesela Nangula Amunyela okwa ti okwa ningi omuhona kuye mwene.

Ta ti, oshimaliwa shopenzela hasho ashike hashi eta omboloto poshitaafula megumbo lye.

Amunyela okwa yambukile momukunda Oshiku-shomuhete moshitopolwa shaMusati noku na egumbo lya dhingolokwa komiti dhiiyimati, moka mu na omiti dhomalemune dhi li 11 oshowo 24 dhomamango.

“Oshimaliwa ihashi gwana, ngaashi ndi na aatekulu mbaka megumbo haya pula omboloto yakehe esiku oshowo okugwanitha po oompumbwe dhilwe dhomegumbo, ond ina okunyangadhala,” ta popi ngaaka.

Ta ti, iiyimati ha likola komiti dhe hoka ohayi mu yambidhidha noonkondo.

Ohandi landitha omalemune gandje kositola yoSpar mOshakati, ndjoka hayi ya okulanda iipakete oyindji lela.

Ta gwedha po ta ti, natango oha ka landitha kuukilinika oshowo koosikola momukunda gwawo.

“Ohaku ti omutumba ethete, okukambadhala okuvule okumwena. Uuna nda ka landitha iiyimati yandje mbyoka, ohandi zi ko nokamaliwa hoka hake ya okuthitika oombululu dhimwe,” ta hokolola ngaaka.

Amunyela ta ti, omuti gwomalemune ogwa fuula oyendji, oshoka anuwa out na eitaalo kutya mbyoka iiyimati yokiilumbu.

Ta ti, nonando ita vulu okufatulula nkene e ya po niiyimati mbyoka, okwa ti okutsika iiyimati okwa kala oshitopolwa shonkalamwenyo ye, sho osho egumbo lye lyu udha omiti dhiiyimati.

Ta ti mOshiwambo ohaku ti uuna egumbo lyi na omiti, iimeno ya tsapuka nawa olyu udha ombili, ano lya fa naana lye ndyo.

Ta  hokolola kutya omiti dhe okwe dhi tsikile omimvo ntano dha piti, nokwa kala a itula mo moku dhi sila oshimpwiyu sigo dha thiki mpoka.

“Otandi kumagidha aanyasha mboka ya kuutumba momagumbo, anuwa ya tegelela epangelo lyi ya pe iilonga, ya tameke okunyangadhala,” ta kumagidha.

Ta ti, iimaliwa kayi na olwaala, kehe shoka tashi vulu oku eta omboloto poshitaafula oshilonga ashike.

– vkaapanda@nepc.com.na