Mueteleli wakatengo ka Affirmative Repositioning (AR) Job Amupanda ukwaluzi muzeko mwa Khuta Yepahami ili mwazekisa muuso, kalitaelo zakuli lukwakwa lwabapendi balimunanu, ili lolu zibahala kamubamba omufubelu luzwisiwe. 

Ubulela kuli kubateñi kwamubamba omufubelu kwashubula, kikashwau, kwaketulula mi kuloba mutomopuso wanaha. 

Amupanda nabulezi hape kuli mubamba omufubelu nosebelisizwe kukauhanya, kubusa ni kufukuza kuzamaya kwabatu babansu ni limunanu zabona mwanako yabukoba; kacwalo ubulela kuli hauna musebezi mwanaha Namibia yelukuluhile. 

Kakuli uloba kalulo yabulobapeli niyabulishumi mwamutomopuso, yebukeleza buntu nikubulela kuli bayahi kaufela balikanelele. 

Muzeko neutile kasamulaho babeleki mwaofesi yebona zasilelezo  yalimunanu neba amuhile Amupanda nama yateko yefita fa N$1000, famuseco waOshivelo mwasikiliti sa Oshikoto. 

Muzeko ukokota likwambuyu wanjimo kuba wapili, muuso wabubeli, yomuhulu wamulao wabulalu, ni Hango Nambinga, mubeleki mwaofesi yetalima makete alimunanu yana muamuhile nama. 

“Mubamba omufubelu kimuyaho wabukoba; kacwalo uloba mutomopuso kabaka lakuli haulumelelwi kimulao ufi mwanaha Namibia – mi hauna niko unungahanywa.

Lukwakwa lubeya batu mwalikwata, hamoho cwalo ni limunanu zabona kuli limwatasi, kacwalo lina ni kutatubiwa matuku, kuamuhiwa, kucisiwa nikuseciwa kusina pampili yelumelela kueza cwalo kibaikalabeli bapili ni babubeli,” Amupanda nabulezi ili yeli muyemeli hape watolopo ya Windoko. Muyemeli wasicaba nalaezi kuli khuta ife taelo yepaka kuli kubea lukwakwa kulwanisana ni mutomopuso, kakuli hakuna mulao olumelela kueza cwalo.  

Nikuli khuta ife taelo yakuli lukwakwa haiba lulumelezwi kimulao, mulao moubeezwi ushubula sicaba; waketulula mi uloba mutomopuso. 

Nakupile hape khuta kufa katulo yakuli kuamuhiwa nama yahae la 17 Kandao neli kuloba mulao, mi hape ikaba kuloba mulao kuamuha batu babashimbile nama yabusunso.